«Շուտով ՌԴ-ում Հայաստանի էքս պաշտոնյա վտարանդիների ակումբ կստեղծվի»․ Լևոն Բարսեղյանը՝ Միքայել Հարությունյանին չարտահանձնելու մասին․ ՏԵՍԱՆՅՈՒԹ

Գյումրու ավագանու անդամ Լևոն Բարսեղյանը Factor.am-ի հետ զրույցում անդրադառնալով գյումրեցի կնոջը դաժանաբար սպանելու մեջ մեղադրվող ռուս զինծառայողին հայկական կողմին հանձնելու պահանջով այսօր ՀՀ-ում Ռուսաստանի դեսպանատան մոտ անցկացված բողոքի ակցիային՝ ասաց, որ Ռուսաստանի Դաշնության արձագանքը, թերևս, կլինի ևս մեկ հաղորդագրություն, թե հերիք է քաղաքականացնեք հարցը, հանցագործը կբացահայտվի, կպատժվի ու վերջ:

Լևոն Բարսեղյանը նաև հավանական չի համարում, որ ռուս զինծառայողին կհանձնեն հայկական կողմին։

«Ռուսաստանն իր զինվորին պահելու է մինչև վերջ: Հնարավոր է, որ դատը, ինչպես արեցին Պերմյակովի դեպքում, անեն ռուսական զորամասի տարածքում, և ՀՀ դատավորը գնա այնտեղ՝ դատը վարելու: Այս տեսակ խայտառակ պատմություն, ինչպիսին եղել է 4 տարի առաջ»,-ասաց Բարսեղյանը։

Հարցին, թե Հայաստանի նոր իշխանությո՞ւնն էլ չի կարողանա ոչինչ փոխել, Բարսեղյանը պատասխանեց. «Դատելով դիրքորոշումներից, հայտնած տեսակետներից, հատկապես դատախազության հաղորդագրությունից՝ Հայաստանի իշխանությունները չեն կարող խնդիրը բերել Հայաստանի ինքնիշխանության դաշտ։ Մեր ինքնիշխանությունը լրջորեն մնում է վնասված։ Սա էլ լրջագույն հարված էր ՀՀ ինքնիշխանությանը: Մանավանդ՝ Հայաստանի իշխանությունների կողմից այդպիսի պահանջ ես առայժմ չեմ լսել»:

Գյումրու ավագանու անդամի խոսքով՝ սպանված կնոջ դուստրն ու անկողնային հիվանդ մայրն առանձնահատուկ ծանր պայմաններում են ապրում։

«Ընտանիքը հոգեբանական ու նյութական աջակցության կարիք ունի։ Վախի տարրեր ես նկատեցի: Նման միջադեպերն ապացուցում են, որ իսկապես Գյումրիում անվտանգության խնդիր կա, և այն կարգավորված չէ: Այն պիտի կարգավորվի կոշտ, տեխնիկական միջոցներով»,- պնդեց Բարսեղյանը:

Ինչ վերաբերում է ՀՀ պաշտպանության նախկին նախարար Միքայել Հարությունյանին արտահանձնելու կապակցությամբ այսօր հայկական կողմին տրված Մոսկվայի պաշտոնական պատասխանին, որ նա ՌԴ քաղաքացի է և նրա նկատմամբ հետախուզումը չեղարկվել է, Լևոն Բարսեղյանն ասաց. «Եթե Հայաստանում խորանալու է անցյալում կատարված հանցագործությունների մասով բացահայտումների, մեղադրանքների շարանը, գուցե Ռուսաստանում ձևավորվի վտարանդի ՀՀ կառավարություն կամ էքս կառավարություն, որովհետև այդպես ապաստան են գտնում, հետո իրենք դա կկոչեն քաղաքական ապաստան: Վստահ եմ՝ մինչև տարվա վերջ լուր կստանանք, որ Ռուսաստանում կստեղծվի Հայաստանի էքս պաշտոնյա վտարանդիների խումբ կամ ակումբ, որտեղ երեկույթներ, ցերեկույթներ կանեն, հայերեն ռազմահայրենասիրական երգեր կերգեն»:

Հարցազրույցի մանրամասները՝ տեսանյութում

Մարինե Խառատյան