Միջազգայնագետ Սուրեն Սարգսյանը Ֆեյսբուքում գրառում է կատարել՝ տեղեկացնելով Հայաստանում ԱՄՆ դեսպանատան կողմից տարիներ առաջ գաղտնալսող սարքերի ձեռքբերման մասին:
«ՀՀ-ում ԱՄՆ դեսպանությունը 2016 թ. ապրիլին ձեռք է բերել գաղտնալսող սարքեր: Դեռ հետևություններ չեմ անում, կարծում եմ, կլինի պաշտոնական պարզաբանում»,- գրել է Սարգսյանը՝ կից հրապարակելով փաստաթուղթը:
Factor.am-ի հետ զրույցում նա նշեց, որ փաստաթուղթը հրապարակվել է Վիկիլիքսի կայքում, և խոսքը ձայնագրող կամ, այսպես կոչված, ներթափանցող սարքերի մասին է: Սուրեն Սարգսյանը հավելեց նաև, որ նման սարքավորումներ ձեռք են բերել Միացյալ Նահանգների դիվանագիտական ներկայացուցչություններ աշխարհի մի շարք երկրներում: «Դրանք կոչվում են ներթափանցման սարքեր՝ iOS և Android համակարգերի համար: Եթե հաշվի առնենք, որ սարքերը ձեռք է բերել Հայաստանում ԱՄՆ դեսպանության թմրանյութերի ապօրինի շրջանառության դեմ պայքարի դեպարտամենտը, կարելի է ենթադրել, որ դրանք հենց այդ ուղղությամբ են օգտագործվելու»,- նշեց նա:
Սուրեն Սարգսյանը, միաժամանակ, կարծում է, որ դրանց ձեռքբերումը համաձայնեցվել է Հայաստանի իրավապահ մարմինների հետ. «Միայն այդ պարագայում հնարավոր կլիներ դրանք ՀՀ տարածք ներմուծել»:
Հավելենք, որ փաստաթղթի հրապարակման և դրանում ներկայացված սարքերի ձեռքբերման մասին փորձեցինք մեկնաբանություն ստանալ նաև Հայաստանում ԱՄՆ դեսպանատան մամուլի ծառայությունից: Այստեղ տեղեկացրեցին, որ ամերիկյան դիվանագիտական ներկայացուցչությունում այսօր ոչ աշխատանքային օր է՝ կաթոլիկ Սուրբ Ծննդյան տոնի կապակցությամբ, և հարցմանը գրավոր կկարողանան պատասխանել միայն վաղը:
