Օսիպյանի ոստիկանությունը չի կարող լինել իրավապահ կառույց․ Գևորգ Սաֆարյան. ՏԵՍԱՆՅՈՒԹ

Factor.am-ի հարցազրույցը «Սասնա ծռեր» կուսակցության անդամ Գևորգ Սաֆարյանի հետ:

– Պարոն Սաֆարյան, մեկ տարի առաջ Factor TV-ի ստեղծագործական անձնակազմն աշխատում էր «Կայծեր» հաղորդման հերթական սյուժեի վրա, որի հերոսը Դուք էիք: Այդ ժամանակ տոնածառ տեղադրելու գործով ազատազրկված էիք: Չէիք կարող նույնիսկ ենթադրել, որ այսօր՝ մեկ տարի անց, կգտնվեք մեր տաղավարում և կպատասխանեք մեր հարցերին։ Ինչպիսի՞ն էր 2018 թվականը Ձեզ համար:

– Շնորհակալ եմ թե՛ «Կայծեր»-ի, և թե՛ ամբողջ պրոցեսը լուսաբանելու համար: Համաձայն չեմ այն մոտեցման հետ, որ ենթադրել չէր կարելի, որ ես կլինեի դրսում: Շատերը համարում են, որ փոփոխությունները երկնքից իջած ինչ-որ հրաշք էին: Ոչ մի հրաշք չկար այն բանի մեջ, որ կեղեքված ժողովուրդն ի վերջո ապստամբում է իրեն կեղեքողների դեմ: Միշտ կար այդ համոզմունքն իմ մեջ, որ նախորդ ռեժիմը տապալվելու է, և դրանից հետո դուրս ենք գալու բանտերից: Հիմա արդեն ժամանակն է, որ մենք մոռանանք նախորդ ռեժիմը, նրա չափորոշիչներն ու գործողությունները: Բայց կա ցավալի մի մոտեցում, որ մեր քաղաքացիներից շատերը, երբ լսում են քննադատություն այս կամ այն պետական գործչի վերաբերյալ, համեմատելով նախորդ պաշտոնյայի հետ՝ ասում են՝ բայց դե նա ավելի վատն էր: Սա պիտի մոռանանք: Նա վատն էր, իսկ հիմա մենք պիտի ունենանք լավ պաշտոնյաներ, հետո՝ ավելի լավ, և մեր պետության ընթացքը պիտի գնա միայն դեպի լավը:

– Եթե հիշելու լինենք Ձեր քաղաքացիական, քաղաքական պայքարի պատմությունը, Դուք մշտապես հակադրությունների մեջ էիք ոստիկանության, ուժայինների հետ: Հեղափոխությունը ձեր հարաբերություններում փոխե՞ց ինչ-որ բան։

– Խնդիրը իմ և ոստիկանության հարաբերությունների մեջ չէր: Իմ հարաբերություններն այդ կառույցների հետ բացասական էր, որովհետև նրանք ոչ թե իրավապահ, այլ իրավախախտ կառույցներ էին: Մինչ օրս շարունակվում է դա: Օսիպյանի ոստիկանությունը չի կարող լինել իրավապահ կառույց: Վերջերս որոշակի աղմուկ բարձրացավ, որ մեր ԱԱԾ-ն տոնում է ԿԳԲ-ի օրը։ ՀՀ Ազգային անվտանգության ծառայությունը չպիտի իրեն համարի ժառանգորդը տոտալիտար Սովետական միության ԿԳԲ-ի: Քանի դեռ այս փիլիսոփայությունը գործում է մեր, այսպես կոչված, իրավապահ մարմիններում, մենք չենք ունենալու այն իրավապահ մարմինները, որն առնվազն ես կուզենայի ունենանք, քանի դեռ մեր իրավապահ համակարգը նախորդ ռեժիմին ծառայած ոճրագործներին չի պատժել, օրինակ՝ Օսիպյանը պարգևատրված է ոստիկանապետի պաշտոնով, իհարկե՝ սա ցավալի է:

– «Սասնա ծռեր» կուսակցությունը ճանաչել է խորհրդարանական ընտրությունների արդյունքները: Ձեր բացակայությունից նոր խորհրդարանն ի՞նչ է կորցնում։

– Նոր խորհրդարանը կորցրեց զսպող ուժ։ Եթե խորհրդարանի մեծամասնությունն ինչ-ինչ հարցերում սխալվեր, մենք կլինեինք այն ուժը, որը կբարձրաձայներ դրա մասին, արտաքին դաշտից ճնշումները Հայաստանի կառավարության վրա կլինեին անհամեմատ քիչ, եթե «Սասնա ծռերը» լինեին Ազգային ժողովում: Այսօր մենք տեսնում ենք մեր դաշնակից պետությունների ղեկավարների կողմից հեգնական վերաբերմունք Հայաստանի ղեկավարների նկատմամբ: Այս վերաբերմունքը չէր լինի, եթե Ազգային ժողովում լինեին «Սասնա ծռերը», որովհետև բոլոր այդ պետությունները գիտեն, որ «Սասնա ծռերը» Հայաստանի իշխանության դեմ կատարած ցանկացած գործողություն բերելու են Ազգային ժողով և դարձնելու քննարկման առարկա, և տեսնելով սա՝ հայ հանրությունը ընդվզելու է այն պետությունների դեմ, որոնք փորձում են մեր ինքնիշխանությունը ոտնահարել: «Սասնա ծռերի» բացակայությամբ չկա այս խնդիրների մասին բարձրաձայնող այդ ուժը: Այս Ազգային ժողովը չունի հակակշռող ուժ:

– Ինչպե՞ս է պատկերացնում «Սասնա ծռեր» կուսակցությունն իր գործունեությունը խորհրդարանից դուրս: ՀՀԿ-ի ու ՀՅԴ-ի հետ մրցակցելո՞ւ եք արտախորհրդարանական ընդդիմության տեղի համար:

– Ո՛չ ՀՅԴ-ն, ո՛չ ՀՀԿ-ն չեն հանդիսանում արտախորհրդարանական ընդդիմություն: Որևէ քաղաքական ձևակերպում այս կառույցներին տալ չի կարելի, մանավանդ՝ ՀՀԿ-ի պարագայում: Սրանք թալանչիների, հանցագործների, ոճրագործների խումբ են, որոնք 30 տարի է՝ թալանում են մեր երկիրը: Սրանք Մարտի 1 անող են, և Մարտի 1-ի կոալիցիոն ուժերի հետ կա մի խոսակցություն. նրանք պիտի անցնեն անցումային արդարադատության քավարանով: Նրանցից այն անձինք, որոնք անցումային արդարադատության միջով անցնելով՝ կապացուցեն, որ անմեղ են, այս անձնաց հետ կարելի է քաղաքական դեբատի մեջ մտնել: Քոչարյանի ու մի շարք այլ անձանց սահմանադրական կարգը տապալելու մեղադրանքներ են առաջադրված: Մարդիկ, որոնք տապալել են սահմանադրական կարգը և զավթել ժողովրդի իշխանությունը, նրանք դիմություն կամ ընդդիմություն, քաղաքական ուժ կոչվելու իրավունք չունեն։ Նրանք հանցագործների խունտա են և պիտի պատժվեն անցումային արդարադատության մեխանիզմների միջոցով:

Հարցազրույցի մանրամասները՝ տեսանյութում
Ռոբերտ Անանյան