Սամվել Ալեքսանյանը մեծ թափով վերսկսել է 25-րդ «Երևան Սիթիի» շինարարությունը. ինչո՞ւ էր աշխատանքները հեղափոխությունից հետո դադարեցրել

Երևանի Մովսես Խորենացու փողոցում՝ «Ռոսիա մոլի» ետնամասում, վերսկսվել են Սամվել Ալեքսանյանին պատկանող «Երևան Սիթի» սուպերմարկետի շինարարական աշխատանքները: Այս սուպերմարկետի շինարարությունը սկսվել էր դեռ 2018 թվականի քաղաքական հայտնի փոփոխություններից առաջ: Սակայն, հեղափոխությունից հետո, երբ ԱԱԾ-ն ու ՊԵԿ-ը սուպերմարկետներում՝ այդ թվում «Երևան Սիթիի» ցանցերում ստուգումներ իրականացրին, նշված հասցեի սուպերմարկետի շինարարական աշխատանքները դադարեցվեցին:

Շինարարությունը դադարեցնելու պատճառներից մեկն էլ այն էր, որ «Ռոսիա մոլի» հարևանությամբ կառուցվում էր ֆրանսիական «Քարֆուր» սուպերմարկետի մասնաճյուղ, որն արդեն գործում է: Բացի այս, 2018 թվականի հունիսի 2-ին Նիկոլ Փաշինյանը գովազդել էր «Քարֆուր» սուպերմարկետների ցանցը, ներկայացնելով, որ այնտեղ գնաճ չկա: Սա Սամվել Ալեքսանյանի համար ևս մեկ ազդակ էր եղել առ այն, որ չարժի «Քարֆուրի» հարևանությամբ հերթական «Երևան Սիթին» բացել:

Այս իրադարձություններից ամիսներ անց, սակայն, երբ Սամվել Ալեքսանյանը հարմարվեց նոր իշխանությունների պահանջներին, սկսեց նաև իր բիզնեսը ծաղկեցնել, քանի որ Նիկոլ Փաշինյանը հայտարարում է՝ գործարարները պետք է հարստանան և հարստացնեն պետությունը: Ալեքսանյանը, մասնավորապես, հոկտեմբերին անսալով Փաշինյանի հորդորին, սև դաշտից սպիտակ դաշտ էր տեղափոխել շուրջ 3000 աշխատակցի: Այս մասին Factor.am-ը գրել էր երկու ամիս առաջ:

«Երևան Սիթի» սուպերմարկետների գլխամասային գրասենյակից խնդրեցինք պարզաբանել, թե ինչու էր Խորենացու փողոցի շինարարությունը տևական ժամանակ դադարեցված և ինչու է այն այժմ մեծ թափով վերսկսվել: Սակայն այնտեղից հրաժարվեցին մեկնաբանություն տալ:

Մեկնաբանություն չտվեց նաև Սամվել Ալեքսանյանի օգնականը՝ Արմանը: Ի դեպ, մինչ հեղափոխությունը տեղեկություն կար, որ ևս հինգ «Երևան Սիթի» է բացվելու: Ընկերության գլխամասային գրասենյակից այս տարվա ապրիլին հայտնել էին, որ հստակ է միայն երկուսի բացումը:

Նշենք, որ այդ երկուսն արդեն բացվել են: Մեկը Տիգրան Մեծ պողոստայի 37 հասցեում է, որտեղ նախկինում գտնվում էր Արման Սահակյանին պատկանող «Կրպակ» սուպերմարկետը: Մյուսն էլ բացվել է Րաֆֆու փողոցում: Սակայն այս տարի ևս մեկ մասնաճյուղ էլ բացվել է Ջրվեժում, կրկին նախկին «Կրպակի» տեղում: Այս մասին տեղեկանում ենք «Երևանի Սիթիի» պաշտոնական կայքից:

Հավելենք, որ այս տարի ևս մեկ «Երևան Սիթի» էլ բացվել է Կոմիտասի պողոտայում՝ նախկին «Ֆրեշ» սուպերմարկետի փոխարեն: Իսկ ահա Խորենացու փողոցում բացվողը լինելու է «Երևան Սիթիի» 25-րդ մասնաճյուղը: Սուպերմարկետների ցանցի պաշտոնական կայքի համաձայն՝ այս պահին Երևանում կա 24 գործող մասնաճյուղ:

Ի դեպ, նոր իշխանությունների ներկայացուցիչների և Սամվել Ալեքսանյանի հարաբերությունները ներկայումս բավականին ջերմ են: Վարչապետի կինը որոշ ժամանակ առաջ տեղական արտադրանքը խրախուսելու շրջանակներում ներկայացել էր «Ալեքս տեքստիլի» կողմից արտադրված հագուստով: Մի քանի օր առաջ էլ, երբ Աննա Հակոբյանն այցելել էր ծերերի խնամքի կենտրոն, Սամվել Ալեքսանյանի ընկերությունը արձագանքել էր նրա կոչին և նվերներ տրամադրել: Դե իսկ Սամվել Ալեքսանյանին պատկանող «Երևան Սիթի»-ներում «Վարչապետ» բրենդով օղու վաճառքի մասին շատ է խոսվել։

Հայկ Վարդանյան