Հասարակություն
24.12.2018 | 13:32Գլխավոր դատախազությունը համաձայն չէ Մանվել Գրիգորյանին գրավով ազատ արձակելու՝ Առաջին ատյանի դատարանի որոշման հետ և առաջիկայում կբողոքարկի այն: Գրիգորյանին ազատ արձակելու դեմ բողոքի ակցիայի մասնակիցների հետ դեկտեմբերի 24-ի հանդիպմանն այս մասին հայտարարեց գլխավոր դատախազ Արթուր Դավթյանը:
«Մենք ստացել ենք դատական ակտը, համաձայն չենք այդ դատական ակտի հետ և մեր հիմնավորումներով ներկայում պատրաստում ենք բողոքը: Ամեն ինչ անում ենք, որ բողոքը մուտք լինի Վերաքննիչ դատարան: Դատարանը հիմնականում իր փաստարկները կապել է հիվանդության հետ: Ըստ էության՝ ոչ թե կալանքի հիմքեր չի տեսել, այլ գտել է, որ գրավը կարող է տվյալ իրավիճակում փոխարինել կալանքին, որի հետ մենք համաձայն չենք»,- հավելեց նա:
Արթուր Դավթյանի խոսքով՝ օրենքը նախատեսում է, որ Վերաքննիչ դատարանն Առաջին ատյանի դատարանի ակտի ստուգումն իրականացնում է նյութերը ստանալու օրվանից հետո երեք օրվա ընթացքում. «Այսինքն՝ հենց որ նյութերը ստանա, երեք օրվա ընթացքում կնշանակի նիստ, որի ընթացքում կստուգվի Առաջին ատյանի դատարանի ակտի օրինականությունը: Մնացածի մասին դուք կտեղեկանաք»:
Գլխավոր դատախազը նաև չբացառեց, որ Մանվել Գրիգորյանին առաջադրված մեղադրանքը կլրացվի:
Մանրամասները՝ տեսանյութում
