ԱԱԾ-ի գործակալների հարցով պետք է լյուստրացիա կատարվեր, որ գործակալը քաղաքականությամբ չզբաղվեր․ Ավետիք Իշխանյան․ ՏԵՍԱՆՅՈՒԹ

«Ինձ համար մտահոգիչ է, որ Ազգային անվտանգության ծառայության 100-ամյակը միաժամանակ նշվում էր նաև Ռուսաստանում, իսկ օրերս մեզ մոտ այդ ծառայության 100-ամյակի միջոցառման ժամանակ հնչած ելույթներից որոշներն էլ ցույց տվեցին, որ այս ծառայության աշխատողները հպարտ և ուրախ են, որ խորհրդային КГБ-ի շարունակողներն են։

Այս մասին այսօր «Ազգային անվտանգության մարմինների կազմավորման 100-ամյակը, ձեռքբերումներ և բացթողումներ թեմայով» քննարկման ժամանակ ասաց իրավապաշտպան Ավետիք Իշխանյանը։

Վերջինս հարց հնչեցրեց․ իսկ ի՞նչ ամոթալի բան կլիներ, եթե մեր Ազգային անվտանգության ծառայության սկիզբը դրված լիներ 1991 թվականից։ «1991 թվականից մինչև այս թավշյա հեղափոխության շրջանը գնահատական պետք է տրված լիներ՝ թե այս ընթացքում այդ ծառայության գործունեությունն ինչ փոփոխությունների է ենթարկվել և ինչ տարբերություններ են առկա։ Իսկ որպեսզի այդ տարբերությունը հստակեցվի, պետք է 1991 թվականից հետո ընդունվեր իրավաքաղաքական հռչակագիր, որով պետք է լուծվեր գործակալների հարցը։ Պետք է հստակ լյուստրացիա կատարվեր և ամրագրվեր՝ գործակալներն այլևս իրավունք չունեն զբաղվելու քաղաքականությամբ, եթե մեկը զբաղվեր, նրա անունը պետք է հրապարակեին, սակայն դա չի արվել»,- նկատեց իրավապաշտպանը։

Ավետիք Իշխանյանը նաև նշեց, որ Ազգային անվտանգության ծառայությունը պետք է վարչապետին կից ծառայությունից վերածվի խորհրդարանի վերահսկողության տակ գտնվող կառույցի։

Մանրամասները՝ տեսանյութում։