Քաղաքականություն
21.12.2018 | 19:00Քաղաքագետ Էդգար Վարդանյանը Factor.am-ի հետ զրույցում տեսակետ հայտնեց, որ Հայաստան-Ռուսաստան հարաբերությունները բարձր մակարդակի վրա են: Ըստ նրա ՝ ՀՀ նախկին իշխանությունները, նրանց սպասարկող լրատվամիջոցներն ամեն առիթ օգտագործում են, որպեսզի հարվածեն Փաշինյանի հեղինակությանը և Հայաստանի ու որևէ այլ երկրի հարաբերությունները ներկայացնեն որպես վատթարացող հարաբերություններ:
«Հասկանալի է, որ նախկին իշխանություններն են շահագրգռված դրանում։ Չի բացառվում, որ նախկին իշխանությունների հետ՝ Մոսկվայի որոշակի շրջանակներ նույնպես մասնակցում են դրան, բայց դա պաշտոնական Մոսկվան չէ»,- նշեց քաղաքագետը:
ՌԴ ԱԳՆ խոսնակ Մարիա Զախարովան, լրացնելով օրերս ՌԴ փոխարտգործնախարար Գրիգորի Կարասինի հայտարարությունը Հայաստանի մասին, ասել է՝ «թույլ չենք տա որևէ շանտաժ պետության նկատմամբ, որը գտնվում է իր պետականության կառուցման ոչ հեշտ ճանապարհին»: Հարցին՝ ինչո՞ւ է Ռուսաստանն այդքան ագրեսիվ «պաշտպանում» Հայաստանին, քաղաքագետը պատասխանեց, որ այսօր ակնհայտ է՝ ավտորիտար լիդերներից մեկի դաշնակիցը լրիվ այլ ուղղությամբ է գնում՝ սեփական երկրում ժողովրդավարության, եվրոպական արժեքների հաստատմամբ: Սա, բնականաբար, կարող է մտահոգել Ռուսաստանին:
Հարցին՝ արդյո՞ք ՌԴ պաշտոնյաների հայտարարությունները կապ ունեն ՄԱԿ-ում Հայաստանի քվեարկության հետ, և որ ՌԴ-ն փորձում էր ամեն ինչ անել, որ Հայաստանը մնա իր ազդեցության ներքո և քվեարկի այնպես, ինչպես Ռուսաստանն էր ուզում, քաղաքագետը պատասխանեց. «Պուտինը միշտ ասել է, որ հուսով է՝ Հայաստանը միջազգային ասպարեզում կաջակցի Ռուսաստանի գործունեությանը: Դա ենթադրում է, որ հենց նման բանաձևերի ժամանակ Հայաստանը կաջակցի Ռուսաստանին, ոչ թե Արևմուտքին։ Բայց Հայաստանը ցույց է տալիս, որ թեև հայտարարել է, որ արտաքին քաղաքական կուրսը չի փոխում, նաև ցույց է տալիս, որ դա չի փոխի այնքան ժամանակ, քանի դեռ դա պահանջում է Հայաստանի շահը: Այն, որ մենք այսօր սուվերեն ենք, բնականաբար, մտահոգում է Ռուսաստանին: Եթե վաղը տեսնենք, որ մեր մտահոգությունները չեն փարատվում, կարող ենք փոխել մեր դիրքորոշումը»:
Հետաքրքրվեցինք նաև, թե ՄԱԿ-ում քվեարկությունը կարո՞ղ է դիվիդենտներ բերել Մոսկվայում առաջիկա բանակցությունների ժամանակ: «Դժվար է միանշանակ պատասխան տալ, հետազոտության կարիք կա՝ արդյո՞ք Հայաստանն իրականում չունի այլընտրանք։ Կա տեսակետ, որ այս պահի դրությամբ Հայաստանը չունի այլընտրանք։ Այսինքն՝ ինքը պետք է կոմպրոմիսի գնա, որովհետև Ռուսաստանը, լինելով լուրջ ու ագրեսիվ խաղացող, կարող է բացասաբար ազդել մեր երկրի անվտանգության վրա»,-ասաց քաղաքագետը՝ հավելելով. «Եթե մենք փոխենք մեր արտաքին քաղաքականությունը, Ռուսաստանը կարող է լրջագույն խնդիրներ ստեղծել մեզ համար, և մենք դժվարությունների առջև կկանգնենք»։
Ինչ վերաբերում է Ռոբերտ Քոչարյանին ազատ արձակելու պահանջով վաղն Արցախում հրավիրված ակցիային, Էդգար Վարդանյանը տեսակետ հայտնեց, որ այդ ակցիան որևէ ազդեցություն չի ունենա, ինչպես չունեցավ Երևանում անցկացված փոքրաթիվ միջոցառումը:
«Կարծում եմ՝ նույն բանը կարող է լինել Արցախում: Գիտենք, որ Քոչարյանն ունի ռեսուրսներ և դրանք օգտագործում է, բայց նաև տեսնում ենք, որ շատ ցածր որակի ակցիաներ են կազմակերպվում, և այդ ակցիաները, կարծում եմ, ավելի շատ են վարկաբեկում Քոչարյանին։ Չգիտեմ՝ ով է խորհուրդ տալիս նրան աջակցել այդպիսի ակցիաների կազմակերպմանը»:
Ըստ քաղաքագետի՝ նոր տարին լինելու է շրջադարձային. «Հստակեցվելու են հիմնական քաղաքականությունները, որոնք լինելու են մոտակա տարիներին: Ըստ էության, մենք ինստիտուցիոնալացնելու ենք հեղափոխությունը»:
Էդգար Վարդանյանի հետ հարցազրույցի մանրամասները՝ տեսանյութում
Մարինե Խառատյան
