Առնվազն երկու տարի է պետք տրանսպորտային խնդիրները լուծելու համար. Հայկ Մարության․ ՏԵՍԱՆՅՈՒԹ

«Ձնամաքրման աշխատանքներն ամբողջությամբ պետք է կատարի «Սանիթեկ» ընկերությունը։ Մենք արդեն այցելել ենք ընկերություն, ստուգել ենք իրենց տեխնիկայի վիճակը, և այն, թե արդյոք ունեն համապատասխան քանակի աղ։ Պետք է նշեմ, որ այն քանակը, որն անհրաժեշտ է Երևան քաղաքն ամբողջությամբ սպասարկելու համար, «Սանիտեկ» ընկերությունը չունի, այդ իսկ պատճառով բանակցություններ ենք վարել ճանապարհաշինարարական աշխատանքներ իրականացնող ընկերությունների հետ, որպեսզի իրենց տեխնիկան վարձրավճարով տրամադրեն «Սանիթեկ»-ին։ Այդ պարագայում մենք կկարողանանք հաղթահարել ձմռան դժվարությունները»,- այսօր Երևանի քաղաքապետարանում լրագրողների հետ ճեպազրույցների ժամանակ ասաց Երևանի քաղաքապետ Հայկ Մարությանը՝ անդրադառնալով  հարցին՝ արդյոք «Սանիթեկ» ընկերությունը պատրաստ է ձմռանը պատշաճ սպասարկում իրականացնել։

Անդրադառնալով Երևանի քաղաքային տրանսպորտի խնդրին՝ Հայկ Մարությանը նշեց, որ առնվազն երկու տարի է պետք տրանսպորտային խնդիրները լուծելու համար։

«850 հազար եվրո տրամադրվել է բրիտանական ընկերությանը: Այդ հաշվարկն արված է 2014 թ.-ին, անցել է 4 տարի, և մենք հարց ենք բարձրացրել, որ իրենց նշած ուղևորահոսքը համապատասխանում է այսօրվա մեր ուղևորահոսքին, և իրենք չեն կարողանում այս հարցին պատասխանել: Եթե 20 տոկոսից ավելի եղավ այս շեղումը, մենք կարող ենք հիմք ընդունել այս ուսումնասիրությունը, եթե ոչ, ապա ամբողջ ուսումնասիրությունը դրվում է հարցի տակ: Նրանց պատասխանն ստանալու ենք հունվար-փետրվարին»,- ասաց քաղաքապետը։

Մանրամասները՝ տեսանյութում։