18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Եթե քաղաքում անկանոն արգելափակոցներ եք տեսնում, ահազանգեք քաղաքապետարանի թեժ գիծ. խոսնակ
Հասարակություն
20.12.2018 | 12:07
Երևանի քաղաքապետարանի մամուլի խոսնակ Հակոբ Կարապետյանը ֆեյսբուքում գրառում է կատարել ու նկարներ հրապարակել՝ քաղաքացիներին խնդրելով անկանոն արգելափակոցներ տեսնելու դեպքում ահազանգել քաղաքապետարանի թեժ գիծ:
«Սիրելի համաքաղաքացիներ,
եթե քաղաքում նման կերպ շարված անկանոն արգելափակոցներ եք տեսնում, խնդրում եմ, ահազանգեք Երեւանի քաղաքապետարանի թեժ գիծ՝ 011 514 000 համարով և/կամ դիմեք ՃՈ՝ 177 համարով: Իսկ եթե Ձեզանից նման արգելափակոցներով կայանատեղերի համար ինչ-որ մարդիկ վարձատրություն են պահանջում, կարող եք դիիմել նաեւ ՊԵԿ՝ ահազանգելով ապօրինի տնտեսական գործունեության դեպքի մասին: Երեւանում վճարովի օրինական կայանատեղերը նշված են կարմիր գծերով, իսկ առանձին տնտեսվարող սուբյեկտների համար առանձնացված կայանատեղերը կահավորված են հատուկ ճանապարհային նշաններով: Նկարում երեւացող արգելափակոցները օրինական չեն կարող լինել»,- գրել է նա:
Հիշեցնենք, որ ՊԵԿ-ն այսօր հաղորդագրություն էր տարածել՝ հորդորելով վճարովի ավտոկանգառների գործունեության համար վճարել սահմանված արտոնագրային հարկը:
«Առևտրային, հանրային սննդի և այլ օբյեկտների կողմից սեփականության իրավունքով իրենց պատկանող կամ վարձակալությամբ օգտագործվող տարածքներում տրամադրվող ավտոկանգառների համար առանձին դեպքերում գանձվում են վճարներ` չկիրառելով ավտոտրանսպորտային միջոցների ելքն ու մուտքը գրանցող համակարգեր: Հաշվի առնելով այդ հանգամանքը, որ նշված գործունեությունը, Հարկային օրենսգրքի 276-րդ հոդվածի համաձայն, հանդիսանում է արտոնագրային հարկով հարկման օբյեկտ` առաջարկում ենք օրենսգրքով սահմանված կարգով հաշվարկել, վճարել արտոնագրային հարկը և ստանալ արտոնագիր` սահմանված պատասխանատվությունից խուսափելու համար»,- ասված է հաղորդագրությունում:
