22.04.2026 | 23:30
ՀՀ տարածքում ավտոճանապարհները հիմնականում անցանելի են
«Որևէ արգելքի մասին նույնիսկ խոսք չի կարող լինել». ՌԴ դեսպանը՝ Լավրովի հայտարարության մասին
Քաղաքականություն
18.12.2018 | 13:56
Հայաստանում ՌԴ դեսպան Սերգեյ Կոպիրկինը վստահեցնում է, որ հայ-ռուսական հարաբերություններում խոսքը երկու ինքնիշխան, իրավահավասար պետությունների մասին է, և ոչ ոք ոչինչ չի կարող արգելել: Դեկտեմբերի 18-ին լրագրողների հետ հանդիպմանը Կոպիրկինն այս մասին ասաց՝ անդրադառնալով ՌԴ ԱԳ նախարարի հայտարարության մասին հարցին:
Սերգեյ Լավրովը, հիշեցնենք, նախօրեին խոսելով Հայաստանում գործող բիոլաբորատորիաների մասին՝ հայտնել էր, որ Մոսկվան ու Երևանն ավարտում են մի փաստաթղթի նախապատրաստումը, որը երաշխավորելու է այդ լաբորատորիաներում օտարերկրյա զինծառայողների բացակայությունը:
«Կցանկանայի փոքր-ինչ սրբագրել տոնայնությունը: Դուք ասում եք՝ «համաձայնագիր», «պայմանագիր», «արգելող»… Ո՞վ, ո՞ւմ և ի՞նչ կարող է արգելել: Խոսքը երկու ինքնիշխան, իրավահավասար պետությունների փոխհարաբերությունների մասին է: Հավատացեք, բոլոր ոլորտներում մեր երկրների հարաբերությունները կառուցվում են հենց այդ կերպ»,- լրագրողի հարցին արձագանքեց դեսպանը:
Սերգեյ Կոպիրկինն ասաց՝ հայկական և ռուսական կողմերի միջև իսկապես բիոլաբորատորիաների գործունեության հարցով երկխոսություն է ընթանում: «Ոչ միայն Հայաստանի, նաև նախկին խորհրդային այլ երկրների հետ, որոնք մեր սահմանների մերձակայքում են: Չեմ թաքցնի, այդ հարցը մեզ անհանգստացնում է, այդ պատճառով էլ մենք երկխոսում ենք: Իմ տեղեկություններով՝ այդ հարցով հայկական կողմի հետ երկխոսությունը բավական կառուցողական է, փոխըմբռնում կա: Չեմ բացառում, որ ինչ-որ փուլում ընդհանուր համաձայնության կհասնենք»,- ասաց նա:
Թե ի՞նչ տեսք կունենա այդ համաձայնությունը, դիվանագետն այս փուլում դժվարացավ նշել, բայց հավաստեց. «Որևէ արգելքի մասին նույնիսկ խոսք չի կարող լինել»:
Կոպիրկինի խոսքով՝ ՀԱՊԿ-ի շրջանակում նույնպես գոյություն ունի համընդհանուր համաձայնություն, որ երրորդ երկրի կողմից ՀԱՊԿ երկրում զինծառայողների տեղակայումը ենթադրում է կազմակերպության մյուս պետությունների հետ այդ հարցի համաձայնեցում:
