Ռոբերտ Քոչարյանին ազատ արձակած դատավորը՝ Հայաստանը լքելու մասին

Ալեքսանդր Ազարյանը պնդում է երկիրը չի լքի, բայց կրկնում է, որ դատական համակարգի վրա ճնշումներ կան․  իրեն, սակայն, «ճնշել հնարավոր չէ»: «Ես չեմ ասում, որ ես եմ ճնշումների ենթարկվել, ինձ հնարավոր չէ ճնշել։ Ես հայտարարել եմ, որ դատական համակարգն է ճնշումների ենթարկվել։ Թե արդյոք Վճռաբեկ, հետագայում Վերաքննիչ դատարանը այդ ճնշումների ազդեցության տակ են որոշում կայացրել, թե` ոչ, ես չեմ կարող ասել։ Իմ կարծիքով, ճնշումներ եղել են»,- Factor.am-ի հետ զրույցում ասաց Մարտի 1-ի գործով մեղադրյալ ՀՀ երկրորդ նախագահ Ռոբերտ Քոչարյանի խափանման միջոցը փոխած և Վերաքննիչ դատարանից ազատ արձակելու որոշում կայացրած դատավոր Ալեքսանդր Ազարյանը։

Մամուլն այսօր գրել էր, որ Ալեքսանդր Ազարյանը մտադիր է առաջիկայում լքել Հայաստանը՝ եվրոպական երկրներից մեկից քաղաքական ապաստան խնդրելով, ըստ «Ժողովուրդ» օրաթերթի նա ցանկանում է ներկայանալ որպես քաղհալածյալ։ Ազարյանը, սակայն, մեզ փոխանցեց, որ այդ լուրերը իրականությանը չեն համապատասխանում․ «Նման բան բացառվում է։ Աշխատելու եմ որքան որ իշխանությունները կգտնեն նպատակահարմար, սա ժամկետի մասին եմ ասում, Հայաստանը լքելու մասին լսել եմ մամուլից»։

Կրկին անդրադառնալով դատական համակարգի վրա իշխանությունների կողմից ճնշումներին, Ազարյանին հարցրինք, իսկ նախկինում ճնշումներ չկայի՞ն․ «Ճնշումներ միշտ էլ կային, զանգեր միշտ էլ կային, այլ հարց է, թե դատավաորը ենթարկվե՞լ է ճնշումներին, պահանջներին, թե՝ ոչ»։

Հարցին, թե արդյոք Նիկոլ Փաշինյանն է փորձել իրեն զանգել, դատավորը բացասական պատասխան տվեց, իսկ ճշտմանը, թե այդ դեպքում արդյոք ԱԱԾ տնօրենն է փորձել որևէ կերպ միջամտել գործին, Ազարյանն ասաց՝ ոչ կոռեկտ եմ համարում այդ հարցին պատասխանելը։

Լիլիթ Շաբոյան