Ինչո՞ւ են նույն քրգործը Քննչական կոմիտեն և Դատախազությունը հարուցում ՔՕ-ի տարբեր հոդվածներով, և ո՞վ է ում հետ մրցում

Երեկ Արցախում զինծառայող Ռաֆիկ Հակոբի Վահանյանը  հրազենային վիրավորում էր ստացել աչքի հատվածում, ինչի առթիվ և Դատախազությունում և Քննչական կոմիտեում հարուցվել էր քրեական գործ:

ՀՀ գլխավոր դատախազության հանրային կապերի բաժնի պետ Արևիկ Խաչատրյանը հայտնել էր, որ հարուցվել է քրեական գործ ՀՀ ՔՕ-ի 373-րդ հոդվածի 1-ին մասի հատկանիշներով։

«Զենքի, ռազմամթերքի, ինչպես նաև ռադիոակտիվ նյութերի, պայթուցիկ կամ շրջապատի համար առավել վտանգ ներկայացնող այլ սարքերի, առարկաների կամ նյութերի հետ վարվելու կանոնները խախտելը, որը մարդու առողջությանն անզգուշությամբ պատճառել է թեթև կամ միջին ծանրության վնաս, որի համար նախատեսված է պատիժ՝ զինվորական ծառայության մեջ սահմանափակմամբ` մեկից երեք տարի ժամկետով կամ կարգապահական գումարտակում պահելով՝ առավելագույնը երկու տարի ժամկետով կամ ազատազրկմամբ՝ առավելագույնը երկու տարի ժամկետով»,-ասված է լրատվականին տրված պարզաբանման մեջ:

Նույն զինծառայողի՝ Ռաֆիկ Հակոբի Վահանյանի՝ հրազենային վիրավորում ստանալու դեպքի առթիվ քրեական գործը, ի տարբերություն Դատախազության, Քննչական կոմիտեում հարուցվել է ոչ թե ՔՕ-ի 373-րդ հոդվածի 1-ին մասի հատկանիշներով, այլ՝ ՔՕ-ի 373-րդ հոդվածի 2-րդ մասով։

Ստացվում է՝ ըստ Դատախազության՝ հարուցվել է քրգործ միջին ծանրության, իսկ ըստ Քննչական կոմիտեի՝ ծանր վնասվածք հասցնելու դեպքի առթիվ։

Թե ինչո՞ւ են Քննչական կոմիտեն և Դատախազությունը նույն դեպքի առթիվ հարուցել քրգործ տարբեր հոդվածներով Factor.am-ը փորձեց պարզել։

ՀՀ Քննչական կոմիտեի դեպարտամենտի տեղեկատվության և հասարակայնության հետ կապերի բաժնի պետ Նաիրա Հարությունյանը Factor.am-ին հայտնեց, որ զինծառայողի աչքի շրջանում հրազենային վնասվածք ստանալու դեպքի առթիվ երկրորդ կայազորային քննչական բաժնում հարուցվել է քրեական գործ՝ ՀՀ քրեական օրենսգրքի 373-րդ հոդվածի 2-րդ մասով:

Հարցին, թե ինչո՞ւ է Դատախազությունը այլ հոդված մատնանշել, Քննչական կոմտեի ներկայացուցիչը նշեց, որ Դատախազությունը սխալ տեղեկություն է հայտնել, այնուհետ խնդրեց, պարզաբանում ստանալ հենց Գլխավոր դատախազությունից:

Մեզ հետ զրույցում, սական,  ՀՀ գլխավոր դատախազության հանրային կապերի բաժնի պետ Արևիկ Խաչատրյանը նշեց, որ այս հարցի վերաբերյալ որևէ մեկնաբանություն կամ պարզաբանում չի ցանկանում անել, իսկ թե ինչո՞ւ է Քննչական կոմիտեն Ռաֆիկ Վահանյանի դեպքի հետ կապված քրգործը հարուցել այլ հոդվածով, խորհուրդ տվեց ճշտել հենց ՔԿ-ից, ինչը մենք արդեն արել էինք։

Ուստի, քանի որ չկա մեկնաբանություն, կարելի է ենթադրել, որ Դատախազությունը նախաքննական մարմնի հետ մրցակցելու արդյունքում է նման սխալ կամ վրիպակ թույլ տվել։

Աղավնի Սուքիասյան