Տնտեսություն
14.12.2018 | 19:47
Գյումրիի քաղաքապետարանում այսօր տեղի ունեցավ քաղաքի գլխավոր ֆինանսական փաստաթղթի՝ 2019 թվականի բյուջեի նախագծի հանրային բաց լսում և քննարկում: Մասնակցում էին ավագանու մի քանի անդամներ, ինչպես նաև քաղհասարակության մի շարք ներկայացուցիչներ: Ըստ նախագծի՝ 2019 թվականին Գյումրիի բյուջեն կլինի 3 մլրդ 587 մլն 973 հազար դրամ, որից 2 մլրդ 150 մլն 507 հազար դրամը կհատկացվի ՀՀ պետական բյուջեից. 2017թ. պետական դոտացիան կազմում էր շուրջ 1 մլրդ 968 մլն 669 հազար դրամ:
Քաղաքապետ Սամվել Բալասանյանը բյուջեն որակեց զարգացող՝ նշելով, որ վարկային ծրագրերը ևս շարունակվելու են: Հենց պետական դոտացիայի ավելացումն էլ բուռն քննարկում առաջացրեց ներկաների շրջանում: Ինչի՞ հաշվին է ավելացել պետական ֆինանսավորումը՝ քաղաքի բնակչության թվի աճի՞, թե՞ այլ եղանակով:
Գյումրու քաղաքապետարանի ֆինանսատնտեսական բաժնի պետ Լենա Ջիլավյանը նշեց, որ կա հատուկ բանաձև, որով Ֆինանսների նախարարությունը հաշվում է և տրամադրում է դոտացիան:
«Կա հատուկ բանաձև, որով հաշվի են առնվում գույքահարկի, հողի հարկի մուտքերը, մեզ մոտ դրանք բավական բարձր են: Հաշվի է առնվում նաև բնակչության թիվը: Իրենք այդ բանաձևով հաշվարկ են անում և դոտացիա հատկացնում: Բանաձևը հայտնի չէ, ոչ մի համայնքի չեն ասում: Ֆինանսների նախարարությունում է հաշվարկը կատարվում, բանաձևը մեզ չեն տալիս»,- ասաց Լենա Ջիլավյանը:
Այս հատուկ բանաձևի փնտրտուքի շուրջ նույնպես բավական բուռն քննարկում ծավալվեց քաղաքապետ Սամվել Բալասանյանի, հանրային լսման մասնակից, ՀՊՏՀ Գյումրու մասնաճյուղի տնօրենի պաշտոնակատար Կարեն Պետրոսյանի և Լենա Ջիլավյանի միջև: Սակայն հաշվարկի հատուկ բանաձևն այդպես էլ չգտան: Արդյունքում Սամվել Բալասանյանի և Կարեն Պետրոսյանի միջև քննարկումը վերածվեց իսկական լեզվակռվի ու վեճի: Սամվել Բալասանյանը կոչ արեց կառուցողական քննարկումը շոուի չվերածել և շտապեց քաղաքաշինության կոմիտեի նախագահ Ավետիք Էլոյան հետ հանդիպման:
Գյումրու 2019թ. բյուջեի նախագիծը կհաստատվի արդեն հունվարին կայանալիք ավագանու նիստում։
Համեմատության համար նշենք, որ Գյումրիի 2017թ. բյուջեն կազմում էր 3 մլրդ 73 մլն 336 հազար դրամ, իսկ 2018 թվականին՝ 3 մլրդ 357 մլն 33 հազար դրամ: 2019 թվականին բյուջեի որոշակի աճ կլինի, որը պայմանավորված է նաև պետական ֆինանսավորման ավելացմամբ:
Հայաստանի անհամաչափ զարգացման պատկերը կարելի է տեսնել նաև քաղաքների բյուջեներն ու եկամուտները համեմատելիս: Օրինակ՝ Երևանի 2018 թվականի բյուջեն 80 միլիարդ 189 միլիոն 969 հազար դրամ էր, որից 4 մլրդ 265 մլն 882 մլն դրամը հատկացվել է միայն հանգստի, կրոնի, մշակույթի ոլորտին: Մինչդեռ Գյումրու ամբողջ բյուջեն նույնիսկ 4 մլրդ դրամի չի հասնում: Այստեղ, իհարկե, տարբերությունը հսկայական է:
Անի Սահակյան
