Հայաստանը թալանած որևէ մեկը չի կարող ազատվել արդարադատությունից. Սուրեն Պապիկյան. ՏԵՍԱՆՅՈՒԹ

Factor.am-ի հարցազրույցը ՀՀ տարածքային կառավարման և զարգացման նախարարի պաշտոնակատար Սուրեն Պապիկյանի հետ

– Պարոն Պապիկյան, «Իմ քայլը» դաշինքն արտահերթ խորհրդարանական ընտրությունների արդյունքում Ազգային ժողովում կունենա այնպիսի մեծ ներկայացվածություն, ինչը չի ունեցել որևէ այլ ուժ։ Դա միայն հաղթանա՞կ է, թե նաև մտահոգություն։

– Պատասխանատվությունը մեծ է, բայց մենք դրանից չենք փախել։ Եվ առկա մարտահրավերները լուծելու ենք հանրության հետ երկխոսության և համատեղ աշխատանքի միջոցով։

– «Բարգավաճ Հայաստան» և «Լուսավոր Հայաստան» կուսակցությունները կարո՞ղ են ձեզ արմատական ընդդիմախոսներ լինել այն պարագայում, երբ նախորդ ամիսներին կառավարությունում ձեր գործընկերներն էին։

– Այդ կուսակցությունները ցույց կտան, թե ինչպիսի ընդդիմություն կարող են լինել, բայց փաստ է, որ դա հանրության ընտրությունն է։

– ԼՀԿ ղեկավար Էդմոն Մարուքյանը հայտարարել էր, որ եթե մեր երկրում բիզնեսը տարանջատված լիներ քաղաքականությունից, իրենք ոչ թե երկրորդ, այլև երրորդ տեղը կզբաղեցնեին։ Այդ հարցում ձեր կառավարությունը թերացե՞լ է։

– Մեր կառավարությունը չի թերացել։ Այն խնդիրները, որ դրել էինք մեր ժամանակավոր կառավարության առաջ, ըստ էության, գոնե մեր կողմից լուծվել են։ Ընտրական օրենսգրքում առաջարկված փոփոխությունները թեև չընդունվեցին, բայց մեր կառավարությունը հասցրեց նրան, որ խորհրդարանը քվեարկի կողմ կամ դեմ։

– Բայց դա կարելի՞ է որպես արդյունք գրանցել այն դեպքում, երբ ձեր առաջարկած նախագիծը չընդունվեց։

– Բայց մենք մեր հասանելիքը կատարել ենք։ Խորհրդարանին պիտի պարտադրեի՞նք, որ ընդուներ։ Կարծում եմ՝ սա համատեղ պատասխանատվության խնդիր է, և հանրությունը տվեց դրա գնահատականը. խորհրդարանական ընտրություններին Հանրապետական կուսակցությունը չհաղթահարեց 5 տոկոսի շեմը։ Անդրադառնալով ԼՀԿ-ին՝ կարծում եմ՝ ոչինչ չի խանգարի, որ այդ ուժը դեկապիտալիզացիայի մասին օրենք ներկայացնի:

– Իսկ Ձեզ գոհացնո՞ւմ է այն իրավիճակը, որ Հանրապետական և «Դաշնակցություն» կուսակցությունները չանցան խորհրդարան։

– Ես քաղաքական գործիչ եմ և պարտավոր եմ հաշվի նստել հանրության որոշման հետ: Եվ մենք դա ընդունում ենք ի գիտություն:

Հարցազրույցի մանրամասները՝ տեսանյութում

Արմինե Ավետյան