12.10.2026 | 23:18
Գազամատակարարման դադարեցումներ՝ Հայաստանի մի շարք հասցեներում
ԱՄՆ-ն դեմ է Սիրիայի քրդերի դեմ Թուրքիայի ծրագրած ռազմական գործողությանը
Քաղաքականություն
13.12.2018 | 12:48
ԱՄՆ-ն արձագանքել է Սիրիայի հյուսիսում քրդական ուժերի դեմ Թուրքիայի զինուժի կողմից իրականացվելիք ռազմական գործողության մասին Էրդողանի հայտարարությանը. փոխանցում է ermenihaber-ը:
Պենտագոնի մամուլի ծառայության տարածած հայտարարության մեջ ասվում է, որ ամերիկյան կողմն անընդունելի է համարում Սիրիայի հյուսիսում չհամաձայնեցված որևէ ռազմական գործողություն սկսելը:
«Սիրիայի հյուսիս-արևելքում, հատկապես ամերիկացի զինվորների տեղակայման կամ դրանց մոտ գտնվող վայրերում, կողմերից որևէ մեկի նախաձեռնելիք ռազմական գործողությունները խորը մտահոգություն են առաջացնում: Անընդունելի ենք համարում չհամաձայնեցված նմանատիպ գործողությունները»:
Պենտագոնի հայտարարության մեջ նաև նշվում է, որ նման գործողությունները կարող են վտանգել «Իսլամական պետություն» ահաբեկչական խմբավորման դեմ ԱՄՆ-ի գլխավորած կոալիցիոն ուժերի տարած հաղթանակները և ԻՊ-ին այդ շրջաններում կրկին ակտիվանալու հնարավորություն տալ:
Հիշեցնենք, որ դեկտեմբերի 12-ին Թուրքիայի նախագահ Ռեջեփ Թայիփ Էրդողանը հայտարարել էր, որ երկրի զինված ուժերը մի քանի օրվա ընթացքում ռազմական գործողություն կսկսեն Սիրիայում: Էրդողանը նշել է, որ թիրախում լինելու են Եփրատ գետի արևելյան հատվածում տեղակայված քրդական ուժերը՝ ավելացնելով, որ նախապատրաստական բոլոր աշխատանքներն արդեն ավարտվել են։
Էրդողանը նաև շեշտել է, որ իրենց ռազմական գործողությունների թիրախը ոչ թե տարածքում գտնվող ամերիկացի զինվորներն են, այլ Սիրիայի քրդերի «Ժողովրդավարական միություն կուսակցության» (PYD) զինված ուժերը հանդիսացող «Ժողովրդի պաշտպանական ուժերը» (YPG), որոնց պաշտոնական Անկարան համարում է ահաբեկչական: Անկարան YPG-ն համարում է Թուրքիայում և մի շարք այլ երկրներում ահաբեկչական կազմակերպություն համարվող «Քրդական աշխատավորական կուսակցության» (PKK) սիրիական թևը:
