Ճիշտ է, որ Ռոբերտ Քոչարյանը ձերբակալված է, բայց սխալ է, որ Սերժ Սարգսյանը ձերբակալված չէ․ Վահան Շիրխանյան․ ՏԵՍԱՆՅՈՒԹ

«Հայաստանում առաջին անգամ կայացան ընտրություններ՝ առանց ընտրակաշառքի, առանց ռեսուրսների օգտագործման, և մենք ունենք իրական պատկերը: Եվ դա ժողովրդի քվեն է, արտացոլում է բոլոր մասնակցող ուժերի վարկանիշը»,- Factor.am-ի հետ զրույցում ասաց ՀՀ պաշտպանության նախկին փոխնախարար Վահան Շիրխանյանը:

Նա անդրադարձավ Ռոբերտ Քոչարյանի կալանավորմանը, ինչպես նաև նախկին նախագահի և նրա աջակիցների կողմից դա «քաղաքական հետապնդում» որակելուն. «Ռոբերտ Քոչարյանի, Սերժ Սարգսյանի 20-ամյա իշխանությունը ոչ լեգիտիմ իշխանություն է, իշխանությունը բռնազավթված է եղել։ Հայաստանում նրանք օգտագործել են պետական ահաբեկչություն, Մարտի 1-ը պետական ահաբեկչություն էր: Ճիշտ է, որ Ռոբերտ Քոչարյանը ձերբակալված է, բայց սխալ է, որ Սերժ Սարգսյանը ձերբակալված չէ: Հուսով եմ, որ Սերժ Սարգսյանի ձերբակալումը չի ուշանա և կավելացվի նաև Տիգրան Սարգսյանի անունը»:

Անդրադառնալով Արցախի հարցի հետ կապված մտահոգություններին՝ Վահան Շիրխանյանը նշեց, որ Արցախը կարող էր դառնալ Հայաստանի պարենային ապահովման շտեմարան, բայց Հայաստանը դարձավ նրա խնամակալը: «Մենք Արցախին պահում ենք ամեն ինչով: Ինչո՞ւ, որովհետև Սերժ Սարգսյան-Ռոբերտ Քոչարյան զույգն ի սկզբանե որոշել էր ազատագրված տարածքները հանձնել և դրանք չօգտագործել, չբնակեցնել, և տարիներ շարունակ Արցախը թուլացվում էր»,- ասաց նա:

Վահան Շիրխանյանը նաև հռետորական հարց հնչեցրեց. «Ի՞նչ են արել նախկին 20-ամյա իշխանություններն Արցախում, որ հիմա ասում են՝ Նիկոլը եկել է ու Արցախը թուլացնում է: Դրանք հորինովի, կեղծ մեղադրանքներ են, որոնք ոչ մի հիմք չունեն։ Ես կասեի՝ ընդհակառակը. այն, որ Նիկոլ Փաշինյանը մի քանի անգամ գնաց Արցախ, առաջին գիծ, շփվեց զինվորների հետ, բացահայտեց խնդիրները և այլն, դա Արցախը հզորացնելու սկիզբն է»։

Ի դեպ՝ Վահան Շիրխանայնից տեղեկացանք, որ սպայական միություն է ստեղծելու, ինչի հետ կապված քննարկումներ է ունեցել նաև Դավիթ Տոնոյանի հետ։

Մանրամասները՝ տեսանյութում

Լիլիթ Շաբոյան