Ալիևն ընդունել է Հնդկաստանի ԱԳ նախարարին․ ինչ հարցեր են քննարկվել

Ադրբեջանի նախագահ Իլհամ Ալիևը Բաքվում ընդունել է Հնդկաստանի արտաքին գործերի նախարար Սուբրամանյամ Ջայշանկարին։ Ադրբեջանական կողմի հաղորդագրության համաձայն՝ բարձր գնահատելով Նարենդրա Մոդիի հանձնարարությամբ Հնդկաստանի արտաքին գործերի նախարարի այցը Ադրբեջան՝ Իլհամ Ալիևն ընդգծել է դրա կարևորությունը՝ երկկողմ հարաբերությունների ներկա վիճակն ու զարգացման հեռանկարները քննարկելու տեսանկյունից։

Հանդիպման ընթացքում մտքեր են փոխանակվել Ադրբեջանի և Հնդկաստանի հարաբերությունների ներկա վիճակի շուրջ։ Ընդգծվել է փոխադարձ հետաքրքրություն ներկայացնող ոլորտներում համագործակցության զարգացման լայն հնարավորությունների առկայությունը։

Նշվել է, որ Ադրբեջանն ու Հնդկաստանը, լինելով Գլոբալ հարավի մաս, միջազգային օրակարգի մի շարք հարցերի, այդ թվում՝ Գլոբալ հարավի երկրներին հուզող խնդիրների շուրջ հանդես են գալիս նմանատիպ դիրքորոշումներով։ Այս համատեքստում քննարկվել են քաղաքական, առևտրատնտեսական, բարձր տեխնոլոգիաների, մշակութային, հումանիտար և այլ ոլորտներում երկկողմ համագործակցության զարգացման հեռանկարները։

Զրույցի ընթացքում անդրադարձ է կատարվել նաև միջազգային կազմակերպությունների շրջանակում համագործակցության կարևորությանը։ Ընդգծվել է քաղաքական շփումների և տարբեր մակարդակներով փոխադարձ այցերի, այդ թվում՝ տնտեսական ու գործարար պատվիրակությունների այցելությունների ակտիվացման անհրաժեշտությունը՝ երկկողմ կապերի զարգացման նպատակով։

Թարգմանությունը՝ Էմմա Չոբանյանի