Չեմ կարող ասել՝ սահմանազատումը երբ կսկսվի. Մհեր Գրիգորյան․ ՏԵՍԱՆՅՈՒԹ

Հայաստանի փոխվարչապետ, սահմանազատման հարցերով հանձնաժողովի համանախագահ Մհեր Գրիգորյանը լրագրողների հետ զրույցում անդրադարձավ Հայաստանի և Ադրբեջանի միջև սահմանազատման գործընթացին, կանոնակարգին և անկլավների վերաբերյալ քննարկումներին։

Գրիգորյանը շեշտեց, որ սահմանազատման հանձնաժողովների աշխատանքը բացառապես ընթանում է հաստատված կանոնակարգի և իրավական համակարգի շրջանակներում։

«Ցանկացած հանդիպում և ցանկացած քննարկում, որի վերաբերյալ կա հստակություն, անմիջապես հրապարակվում է։ Մենք ունեցել ենք շուրջ 13 հանդիպում, և բոլոր հանդիպումների վերաբերյալ թե՛ նախօրոք, թե՛ արդյունքներով եղել է պաշտոնական հաղորդագրություն։ Չկա սահմանազատման հետ կապված աշխատանք, որը դուրս է այդ ֆորմատից»,- հայտարարեց փոխվարչապետը։

Պատասխանելով անկլավների/էքսկլավների հնարավոր փոխանակման վերաբերյալ հարցերին՝ Մհեր Գրիգորյանը պարզաբանեց, որ եթե այդ թեմայով, ըստ էության, աշխատանքային քննարկումներ ընթանային հանձնաժողովի շրջանակում, ապա դրա մասին կլիներ պաշտոնական հաղորդագրություն, որտեղ բոլոր հարցերի պատասխանները մաքսիմալ բացահայտված կլինեին։

Հիշեցնենք, որ այսօր Երևանում մեկնարկել է Կենսաբազմազանության մասին կոնվենցիայի կողմերի 17-րդ համաժողովի (COP17) շրջանակում անցկացվող Առաջնորդների գագաթնաժողովը, որի նպատակն է բարձր մակարդակի քաղաքական երկխոսության միջոցով խթանել բնապահպանական միջազգային համագործակցությունը։

Մանրամասները՝ տեսանյութում։

Անի Թամրազյան