05.10.2026 | 20:26
Հայաստանի Մ-21 հավաքականն ընդհատեց պարտությունների շարքը
Արաղչին Միրզոյանին հայտնել է Իրանի պատրաստակամությունը՝ շարունակել բազմակողմ համագործակցությունը, այդ թվում՝ 3+3 ձևաչափով
Քաղաքականություն
05.10.2026 | 20:12
Իրանական կողմը հայտարարություն է տարածել Թեհրանում ՀՀ արտաքին գործերի և միջազգային առևտրի նախարար Արարատ Միրզոյանի և ԻԻՀ արտաքին գործերի նախարար Աբբաս Արաղչիի հանդիպման մասին։ Նշվում է, որ քննարկվել են Թեհրան-Երևան հարաբերությունները, երկկողմ համագործակցության աճող միտումը երկու երկրների համար հետաքրքրություն ներկայացնող տարբեր ոլորտներում, կողմերն ընդգծել են Իրանի և Հայաստանի ղեկավարների՝ հարաբերությունները զարգացնելու և խորացնելու վճռականությունը։
Անդրադառնալով Իրանի և Հայաստանի ժողովուրդների միջև երկարատև և ամուր կապերին՝ Արաղչին ընդգծել է Իրանի մոտեցումը՝ փորձել ընդլայնել հարաբերությունները հարևանների հետ, մասնավորապես, Կովկասում և Կենտրոնական Ասիայում։ Նա ընդգծել է, որ Իսլամական Հանրապետությունը հատուկ նշանակություն է տալիս Հայաստանի հետ բարեկամական և անընդհատ զարգացող հարաբերություններին և Կովկասի ու Կենտրոնական Ասիայի երկրների հետ փոխգործակցության ու հարաբերությունների ամրապնդումը համարում է տարածաշրջանի բոլոր երկրների անվտանգության և խաղաղության երաշխիք և տարածաշրջանի ժողովուրդների տնտեսական աճի ու բարգավաճման ապահովման գործոն, ասվում է հաղորդագրությունում։
Արարատ Միրզոյանը, գոհունակություն արտահայտելով Թեհրան կատարած այցի կապակցությամբ, ընդգծել է Իրան-Հայաստան հարաբերությունների ռազմավարական բնույթն ու Երևանի շարունակական հանձնառությունը Իրանի հետ համագործակցությունն ընդլայնելու հարցում, նաև հույս հայտնել, որ Իրան-Հայաստան համապարփակ ռազմավարական գործընկերության համաձայնագրի ստորագրումը կխորացնի երկու երկրների միջև հարաբերությունները։
Իրանի և Հայաստանի արտաքին գործերի նախարարները քննարկել են տնտեսական, քաղաքական, առևտրային, տրանսպորտային և էներգետիկ ոլորտներում համագործակցության հետագա ամրապնդման ուղիները։ Նրանք մտքեր են փոխանակել Կովկասում, Հարավային և Արևմտյան Ասիայում տեղի ունեցող զարգացումների վերաբերյալ։
Բացատրելով Իրանի դիրքորոշումները Կովկասում խաղաղության և կայունության կարևորության վերաբերյալ՝ Արաղչին գոհունակություն է հայտնել ՀՀ-ի և Ադրբեջանի միջև փոխգործակցության և հարաբերությունների շարունակական դրական միտումի կապակցությամբ ու հայտարարել Իրանի պատրաստակամության մասին՝ շարունակել բազմակողմ բանակցություններն ու համագործակցությունը, այդ թվում՝ 3+3 ձևաչափով, խաղաղության գործընթացի կայունացմանը նպաստելու և տարածաշրջանային հաղորդակցությունն ու համագործակցությունն ամրապնդելու համար։
Արաղչին նաև ընդգծել է Կովկասյան տարածաշրջանի գործերին երրորդ կողմերի ներկայությունից և միջամտությունից բխող հետևանքներին և մտահոգություններին ուշադրություն դարձնելու կարևորությունը և տարածաշրջանում երկարատև խաղաղությունն ու կայունությունը համարել է, որ կախված է տարածաշրջանի երկրների կողմից տարածաշրջանային հարցերի լուծումից և արտատարածաշրջանային ուժերի միջամտությունների կանխարգելումից։
Արաղչին նաև հայ գործընկերոջը տեղեկացրել է Պարսից ծոցում և Հորմուզի նեղուցում տեղի ունեցող զարգացումների մասին։
«Իրանի Իսլամական Հանրապետությունը վճռականորեն պաշտպանել է և կպաշտպանի իր շահերն ու ազգային անվտանգությունը, միևնույն ժամանակ, երբեք չի տատանվել օգտագործել դիվանագիտությունը՝ լարվածության սրումը կանխելու համար»,- ասել է նա։
Հաղորդվում է, որ հանդիպման ընթացքում մտքեր են փոխանակվել նաև ՄԱԿ-ի և այլ կազմակերպությունների ու բազմակողմ ձևաչափերի շրջանակում կողմերի համակարգված գործողությունների վերաբերյալ։
Թարգմանությունը՝ Էմմա Չոբանյանի
