Էստոնիան «արմատական ​​վերախմբավորում» է սկսել՝ զորքերը տեղափոխելով ՌԴ սահմանին ավելի մոտ

Էստոնիայում նաև մտավախություն կա, որ Կրեմլը «կարող է արկածախնդրության դիմել՝ օգտվելով հարմար պահից, օրինակ՝ սահմանափակ մասշտաբի ներխուժում ձեռնարկելով՝ ստուգելու ՆԱՏՕ-ի հավաքական պաշտպանության մասին դրույթի ամրությունը»։

Լրատվամիջոցի տվյալներով՝ էստոնացի զինվորականներն ու հետախուզության ներկայացուցիչներն ընդունում են, որ նման սցենարի դեպքում այս պահին ո՛չ Էստոնիան, ո՛չ էլ ՆԱՏՕ-ն հուսալի զսպող մեխանիզմներ չեն ապահովում։ Դա դրդել է անցնել «ակտիվ պաշտպանության» ռազմավարության։

«Մենք պետք է սկսենք սահմանից և հաղթենք արդեն առաջին մարտերում»,- հայտարարել է Էստոնիայի պաշտպանության ուժերի 1-ին բրիգադի հրամանատար, գնդապետ Տարմո Կունդլան։

Բրիգադը երկրի հիմնական մարտական ստորաբաժանումն է։ Նոր ռազմավարության շրջանակում այն մշտական հիմունքներով Տապայից կտեղափոխվի Յիհվի՝ Ռուսաստանի սահմանից 50 կմ հեռավորությամբ գտնվող քաղաք։

«Զսպումը չի աշխատում։ Բալթյան երկրներում բոլորիս համար այս խնդրի լուծման առումով առաջիկա մեկից չորս տարիները լինելու են վճռորոշ ժամանակահատված»,- պարբերականին հայտարարել է Էստոնիայի ռազմական հետախուզության բարձրաստիճան ներկայացուցիչը։

Մայիսին Էստոնիայի կառավարությունն «ակտիվ պաշտպանություն» եզրույթը ներառել է երկրի ազգային անվտանգության հայեցակարգում։

«Այդ ժամանակից ի վեր երկրի փոքրաթիվ, սակայն բարձր պրոֆեսիոնալիզմ ունեցող զինված ուժերը սկսել են քողարկված, բայց արմատական վերախմբավորում»,- գրում է Financial Times-ը։

Նշվում է, որ Էստոնիայի Տապա քաղաքի գլխավոր ռազմակայանից էլիտար ստորաբաժանումներն այժմ մշտական հիմունքներով տեղափոխվում են ավելի արևելք տեղակայված դիրքեր։ Յիհվիում նոր ռազմակայանից բացի՝ Ռուսաստանի հետ սահմանին գտնվող Նարվայում կառուցվում է օբյեկտ, որտեղ ճգնաժամային իրավիճակի դեպքում կարող է տեղակայվել մինչև 1000 զինծառայող։