21.10.2026 | 18:10
TRIPP-ի համաձայնագրի վավերացումն ԱԺ հանձնաժողովում հաստատվեց //ՀԱՊԿ քարտուղարը՝ ՀՀ կարգավիճակի մասին․ ԼՈՒՐԵՐ
Սերբիան և Ադրբեջանը սերբական Նիշում գազային էլեկտրակայան կկառուցեն
Քաղաքականություն
30.09.2026 | 22:03
Սերբիայի պետական էներգետիկ ընկերությունը՝ EPS-ը, գազային ընկերությունը՝ Srbijagas-ը, և Ադրբեջանի պետական նավթային ընկերությունը՝ SOCAR-ը, բաժնետերերի համաձայնագիր են ստորագրել Նիշ քաղաքում համակցված ցիկլով շոգեգազային էլեկտրակայան կառուցելու վերաբերյալ, գրում են ադրբեջանական լրատվամիջոցները։
Համաձայնությունները նախատեսում են նաև համատեղ ձեռնարկության ստեղծում։ Փաստաթուղթը ստորագրել են EPS-ի և Srbijagas-ի ղեկավարներ Դուշան Ժիվկովիչը և Դուշան Բայատովիչը, ինչպես նաև SOCAR-ի նախագահի՝ զարգացման և պորտֆելի հարցերով խորհրդական, SOCAR Turkey-ի գլխավոր տնօրեն Էլչին Իբադովը։
Համաձայնագրի համաձայն՝ համատեղ ձեռնարկությունում սերբական կողմի մասնակիցների ընդհանուր բաժնեմասը կկազմի 50 տոկոս, իսկ ևս 50 տոկոսը կպատկանի ադրբեջանական կողմին։ Փաստաթուղթը սահմանում է կողմերի իրավունքներն ու պարտականությունները, համատեղ կառավարման սկզբունքները, նախապատրաստական փուլում առանցքային որոշումների միաձայն ընդունման կարգը, ինչպես նաև նախագծային աշխատանքների ֆինանսավորման պայմանները։ Գազային էլեկտրակայանը նախատեսվում է կառուցել առաջիկա չորս տարիների ընթացքում։
Համաձայնագրի ստորագրման նախօրեին տեղի է ունեցել նախագծի Ղեկավար կոմիտեի առաջին նիստը։ Դրա ընթացքում քննարկվել են հետագա քայլերը և Նիշում գազային էլեկտրակայանի կառուցման գործնական իրականացումը։
Թարգմանությունը՝ Էմմա Չոբանյանի
