28.09.2026 | 16:05
Արսեն Մանուկյանը կազատվի Ջրային կոմիտեի գլխավոր քարտուղարի պաշտոնից
Մրգերում հայտնաբերվել են «Դիխլոֆոս» միջատասպան նյութի մնացորդներ․ ՍԱՏՄ
Հասարակություն
28.09.2026 | 15:39
Սննդամթերքի անվտանգության տեսչական մարմինը Սարյան 33/4 հասցեում գործող պտուղ-բանջարեղենի խանութից վերցված մրգերի լաբորատոր փորձաքննությամբ հայտնաբերել է միջատասպան նյութի մնացորդներ։ Դրանից հետո տեսչական մարմինը հայտարարել է պտուղ-բանջարեղենի վաճառակետերում լայնածավալ վերահսկողություն սկսելու մասին։
«Սոցիալական ցանցերում տարածված և հանրային հնչեղություն ստացած տեսանյութի հիման վրա, որում քաղաքացին ականատես է լինում, թե ինչպես է պտուղ-բանջարեղենի խանութի (Երևան, Սարյան 33/4) աշխատակիցը միջատասպան «Դիխլոֆոս» տեսակի նյութ փչում վաճառվող մրգերի վրա, Սննդամթերքի անվտանգության տեսչական մարմնի կողմից ձեռնարկված վերահսկողական միջոցառումների արդյունքում խանութում վաճառվող մրգերից նմուշներ են վերցվել։
Ըստ լաբորատոր փորձաքննության արձանագրության՝ նմուշառված մրգերում հայտնաբերվել են միջատասպան նյութի մնացորդներ։
Տեսչական մարմինը, կարևորելով հանրային առողջության պահպանումը, պտուղ-բանջարեղենի վաճառակետերում կիրականացնի լայնածավալ վերահսկողություն՝ ստուգելով սանիտարահիգիենիկ նորմերի պահպանումը։
Միաժամանակ, վաճառվող պտուղ-բանջարեղենից նմուշներ կվերցվեն և կներկայացվեն լաբորատոր փորձաքննության՝ մնացորդային նյութերի ուսումնասիրության միջոցով պարզելու, թե արդյոք միջատասպան նյութի կիրառման նման դեպքերը կրկնվում են այլ վաճառակետերում ևս։
Հորդորում ենք քաղաքացիներին նման դեպքեր արձանագրելու պարագայում անմիջապես ահազանգել Սննդամթերքի անվտանգության տեսչական մարմնի թեժ գծի 118 հեռախոսահամարով»,- ասված է ՍԱՏՄ-ի տարածած հաղորդագրությունում։
