Զելենսկին հայտնել է, որ Կիևի մարզին ռուսական հարվածի հետևանքով Ադրբեջանի քաղաքացի է զոհվել

Ուկրաինայի նախագահ Վլադիմիր Զելենսկին հայտարարել է, որ Կիևի մարզին ռուսական հարվածի հետևանքով երկու մարդ է զոհվել, որոնցից մեկը Ադրբեջանի քաղաքացի է։ Այս մասին նա գրել է X-ի իր միկրոբլոգում։

Զելենսկին նշել է, որ Ռուսաստանն ամբողջ գիշերվա ընթացքում և մինչև առավոտ հարվածներ է հասցրել երկրի շրջաններին։ Խարկովում հարված է հասցվել բազմահարկ բնակելի շենքի, որի երկրորդ և չորրորդ հարկերը մասնակիորեն ավերվել են։ Կիևում նույնպես վնասներ են պատճառվել անօդաչու սարքերի հարձակումների հետևանքով՝ բնակելի շենքերին, կապի ենթակառուցվածքին և բենզալցակայաններին։

Օդեսայի մարզում հարված է հասցվել Պալաուի դրոշով նավարկող նավի։ Ժիտոմիրի մարզում վնասվել է սովորական պաղպաղակի գործարան։ Բնակելի շենքեր են թիրախավորվել Սումիի, Ռիվնեի, Խարկովի և Օդեսայի մարզերում։ Կրիտիկական ենթակառուցվածք է թիրախավորվել Վիննիցայի, Դնեպրոպետրովսկի, Խմելնիցկիի և Զապորոժիեի մարզերում։

«Այս պահի դրությամբ՝ հաղորդվում է տասնյակ վիրավորների մասին։ Միայն Խարկովին հասցված հարվածի հետևանքով վիրավորվել է 28 մարդ, այդ թվում՝ ինը երեխա։ Ցավոք, կան նաև զոհեր։ Կիևի մարզում երկու մարդ է զոհվել, որոնցից մեկը՝ Ադրբեջանի քաղաքացի։ Ցավակցությունս եմ հայտնում նրանց ընտանիքներին և հարազատներին»,- նշել է Ուկրաինայի նախագահը։

Զելենսկին շնորհակալություն է հայտնել նրանց, ովքեր չեն լռում Ուկրաինայում տեղի ունեցողի վերաբերյալ, և բոլոր նրանց, ովքեր կոնկրետ աջակցության փաթեթներ են պատրաստում։ Ըստ նրա՝ անհրաժեշտ են հստակ որոշումներ։ Հակաօդային պաշտպանություն, էներգետիկ ոլորտին աջակցություն և բյուջետային բացերը ծածկելուն ուղղված օգնություն․ հենց սրանք են այսօր իրականում ամրապնդում Ուկրաինան և օգնում մեր ժողովրդին դիմանալ, հավելել է Զելենսկին։

Ավելի վաղ ադրբեջանական լրատվամիջոցները հայտնել էին, որ Կիևի մերձակայքում գտնվող «Ստոլիչնի» կենտրոնական գյուղատնտեսական շուկան ենթարկվել է Ռուսաստանի բանակի անօդաչու թռչող սարքի հարձակման, որի հետևանքով զոհվել է Ադրբեջանի քաղաքացի՝ Քյուրդամիրի շրջանի բնակիչ Աբբաս Աբբասովը (ծնված 1978 թվականին)։ Նա շուկայում զբաղվել է առևտրով։ Հարձակման հետևանքով վիրավորվել են նաև Ադրբեջանի մի քանի քաղաքացիներ։ Նրանց ինքնությունը պարզվում է։

Թարգմանությունը՝ Էմմա Չոբանյանի