Քաղաքականություն
25.09.2026 | 19:47
ԱՄՆ կառավարության ներդրումները TRIPP-ում ցույց են տալիս մեր հանձնառությունը այս նախագծին։ Ադրբեջանական լրատվամիջոցների հաղորդմամբ՝ այս մասին հայտարարել է Ադրբեջանում ԱՄՆ գործերի ժամանակավոր հավատարմատար Էմի Կարլոնը՝ Ադրբեջանի միջազգային ներդրումային երկրորդ համաժողովի շրջանակում կայացած «Միջին միջանցք․ առևտրի, արդյունաբերության և փոխկապակցվածության ներուժի բացահայտում» խորագրով պանելային քննարկման ժամանակ։
Խոսելով TRIPP նախագծի մասին՝ Էմի Կարլոնը հայտարարել է, որ այս նախաձեռնությունը պարզապես անվանում կամ միջազգային բարգավաճման նպատակով ստեղծված ձևական նախագիծ չէ։
«Այն, որ մենք ստեղծում ենք նոր կառույց, ներդրումներ ենք կատարում դրանում և ապահովում դրա տնտեսական կենսունակությունն ապագայում, ցույց է տալիս, թե որքան լուրջ ենք մենք վերաբերվում այս հարցին»,- նշել է նա։
ԱՄՆ ներկայացուցիչը հայտնել է, որ նախագծի ֆինանսավորման մի մասը կազմում է 201 միլիոն դոլարի հիմնադրամը։ Նրա խոսքով՝ դրա հիմնական նպատակներից մեկը մասնավոր ներդրողների ներգրավումն է։
«Սա կնպաստի մասնավոր հատվածի հետաքրքրության և ներդրումների ներգրավմանը տվյալ ուղղությամբ»,- ընդգծել է դիվանագետը։
Նա անդրադարձել է նաև ԱՄՆ Միջազգային զարգացման ֆինանսական կորպորացիայի (DFC) և ԱՄՆ Արտահանման-ներմուծման բանկի (EXIM) դերերին նախագծի իրականացման գործում։
«Այս կառույցները կարող են օգտագործել այնպիսի ֆինանսական գործիքներ, ինչպիսիք են վարկերն ու երաշխիքները, ինչպես նաև ամերիկյան ընկերությունների համար ռիսկերի ապահովագրությունը։ Դրանով նրանք կբարձրացնեն նման ներդրումներ իրականացնելու հարցում ընկերությունների վստահությունը և իրենց վրա կվերցնեն նման նախագծերի սկզբնական փուլում առաջացող ռիսկերի մի մասը»,- հայտարարել է նա։
Կարլոնի խոսքով՝ ԱՄՆ կառավարության կողմից TRIPP նախագծին հատկացվող ֆինանսավորումն ու ռեսուրսները ցույց են տալիս Վաշինգտոնի հանձնառությունը այս նախաձեռնությանը։
«Այս նախագծում ԱՄՆ կառավարության ներդրումների ծավալը, դրա համար ծախսված ժամանակն ու ջանքերը, ինչպես նաև նախագծի կապը նախագահ Դոնալդ Թրամփի անվան հետ ցույց են տալիս, թե որքան լուրջ ենք մենք վերաբերվում այս նախաձեռնությանը»,- ասել է Կարլոնը։
Ամերիկացի դիվանագետը հավելել է, որ ԱՄՆ-ը TRIPP-ը դիտարկում է որպես կարևոր գործիք՝ աշխարհառազմավարական ռիսկերը նվազեցնելու և տարածաշրջանում վստահությունը մեծացնելու տեսանկյունից։
Թարգմանությունը՝ Էմմա Չոբանյանի
