Ժողովրդագրությունն ու մարդկային կապիտալը՝ Հայաստանի զարգացման օրակարգում․ Աբիսողոմոնյան

ՄԱԿ-ի Գլխավոր ասամբլեայի 81-րդ նստաշրջանի շրջանակում ՀՀ ԱԳՄԱ նախարարի տեղակալ Ռոբերտ Աբիսողոմոնյանը ներկայացրել է Հայաստանի ժողովրդագրական քաղաքականությունն ու մարդկային կապիտալի զարգացման ուղղությամբ իրականացվող բարեփոխումները։

«Սեպտեմբերի 24-ին Նյու Յորքում՝ ՄԱԿ ԳԱ 81-րդ նստաշրջանի շրջանակներում, ՀՀ արտաքին գործերի և միջազգային առևտրի նախարարի տեղակալ Ռոբերտ Աբիսողոմոնյանը մասնակցել և ելույթով հանդես է եկել «Ժողովրդագրական դիմակայունություն. ներդրումներ մարդկային կապիտալում՝ հանուն կայուն ապագայի» խորագրով հարակից միջոցառմանը։

Իր ելույթում ԱԳՄԱ նախարարի տեղակալն ընդգծել է, որ մարդկային կապիտալի զարգացումը և խոցելի խմբերի պաշտպանությունը Հայաստանի զարգացման առաջնահերթությունների առանցքում են։ Այս մոտեցումն արտացոլված է նաև Հայաստանի վերափոխման մինչև 2050թ. ռազմավարությունում, ՀՀ կառավարության գործողությունների ծրագրում և 2026-2030թթ. ծրագրում։

Նախարարի տեղակալ Ռոբերտ Աբիսողոմոնյանը կարևորել է Հայաստան-ՄԱԿ կայուն զարգացման համագործակցության 2026-2030թթ. շրջանակը, որի առաջնահերթություններից են սոցիալական պաշտպանության և ժողովրդագրական դիմակայունության ամրապնդումը, արժանապատիվ աշխատանքը, գենդերային հավասարությունը, կանանց հնարավորությունների ընդլայնումն ու խոցելի խմբերի պաշտպանությունը։

ԱԳՄԱ նախարարի տեղակալն անդրադարձել է սոցիալական պաշտպանության, կրթության և առողջապահության ոլորտներում Հայաստանում իրականացվող բարեփոխումներին՝ ուղղված բարեկեցության բարձրացմանն ու արժանապատիվ աշխատանքի հնարավորությունների ստեղծմանը։ Այս համատեքստում կարևորել է ՄԱԿ Բնակչության հիմնադրամի աջակցությամբ մշակված՝ Հայաստանի ժողովրդագրության 2024-2040թթ. ռազմավարության իրականացումը՝ որպես ժողովրդագրական դիմակայունության ամրապնդման համապարփակ և համակարգված շրջանակ»,- ասված է ԱԳՄԱ-ի տարածած հաղորդագրությունում։