Ալիևը հայտարարել է, թե «Զանգեզուրի միջանցքն» ավելի կամրապնդի Ադրբեջանի դերը՝ «որպես տարածաշրջանային կենտրոնի»

Ադրբեջանի նախագահ Իլհամ Ալիևը կրկին խոսել է, այսպես կոչված, «Զանգեզուրի միջանցքի» մասին։ Այս անգամ առիթը Բաքվում անցկացվող «Ադրբեջանի II միջազգային ներդրումային ֆորում»-ն է։ Հավաքի մասնակիցներին ուղղված ուղերձում նա հայտարարել է, որ Արևելք-Արևմուտք և Հյուսիս-Հարավ միջանցքների խաչմերուկում գտնվող Ադրբեջանը վերածվել է Ասիայի ու Եվրոպայի միջև կարևոր կապող օղակի և հանգույցի։

«Միջին միջանցքը Կենտրոնական Ասիան Կասպից ծովի միջոցով կապում է Հարավային Կովկասի, Թուրքիայի ու Եվրոպայի հետ։ Ձևավորվող Զանգեզուրի միջանցքը, որը հայտնի է նաև որպես TRIPP կապի երթուղի, կամրապնդի Ադրբեջանի դերը՝ որպես տարածաշրջանային կենտրոնի և կստեղծի նոր հնարավորություններ Եվրասիական տարածաշրջանում առևտրի, ներդրումների և արդյունաբերական համագործակցության համար»,- հայտարարել է Ալիևը։

Նա նաև ասել է, որ Հարավային Կովկասում հաստատվող խաղաղությունը նոր հնարավորություններ է ստեղծում տարածաշրջանային առևտրի և ներդրումների համար։

«Համաշխարհային տնտեսական հարաբերություններն արագորեն փոխվում են, մատակարարման շղթաները վերակառուցվում են, ձևավորվում են նոր տրանսպորտային, էներգետիկ և տեխնոլոգիական կապեր։ Նման պայմաններում կայունությունը, փոխկապակցվածությունն ու վստահելի գործընկերային հարաբերությունները ներդրումների համար ավելի ու ավելի մեծ նշանակություն են ձեռք բերում։Հարավային Կովկասում հաստատվող խաղաղությունը նոր հնարավորություններ է ստեղծում տարածաշրջանային համագործակցության, փոխկապակցվածության, առևտրի և ներդրումների համար՝ միաժամանակ նպաստելով ավելի խոր տնտեսական ինտեգրմանն ու դիվերսիֆիկացմանը»,- ասվում է Ալիևի ուղերձում։

Հավելենք, որ Վաշինգտոնում 2025 թվականի օգոստոսի 8-ին ստորագրված փաստաթղթերում «Զանգեզուրի միջանցք» եզրույթ օգտագործված չէ։ Դրանցում նշվում է «Թրամփի ուղու» (TRIPP) մասին, սակայն Բաքվի քարոզչամեքենան Ալիևի գլխավորությամբ շարունակում է «միջանցք» եզրույթն օգտագործել՝ խեղաթյուրելով ստորագրված փաստաթղթերի բովանդակությունը։

Թարգմանությունը՝ Էմմա Չոբանյանի