Ուկրաինական ԶԼՄ-ն հայտնել է Նյու Յորքում Ուկրաինայի, ՌԴ-ի և ԱՄՆ-ի ներկայացուցիչների եռակողմ հանդիպման մասին

Երեքշաբթի ՄԱԿ-ի Գլխավոր վեհաժողովի շրջանակում Ուկրաինայի նախագահ Վլադիմիր Զելենսկիի և ԱՄՆ նախագահ Դոնալդ Թրամփի բանակցությունների ընթացքում հաջողվել է պայմանավորվածություն ձեռք բերել հինգշաբթի եռակողմ ձևաչափով հանդիպում անցկացնելու վերաբերյալ։ Նման պնդում է անում ուկրաինական ZN.UA-ն՝ հղում անելով դիվանագիտական աղբյուրին, գրում է BBC-ի ռուսական ծառայությունը։

Աղբյուրի տեղեկություններով՝ հանդիպմանը կարող են մասնակցել Ուկրաինայի նախագահի աշխատակազմի ղեկավար Կիրիլ Բուդանովը և Կիևի գլխավոր բանակցող Ռուստեմ Ումերովը, ԱՄՆ նախագահի հատուկ բանագնացներ Սթիվ Ուիթկոֆը և Ջարեդ Քուշները, ինչպես նաև ԱՄՆ մեկնած ՌԴ նախագահի հատուկ ներկայացուցիչ Կիրիլ Դմիտրիևը։

Ըստ ZN.UA-ի՝ քննարկման գլխավոր թեման լինելու է «էներգետիկ հրադադարը», «թե ինչպես են կողմերն այն մեկնաբանում» և «դրա պահպանման վերահսկողության մեխանիզմները»։

Զելենսկիի խորհրդական Դմիտրի Լիտվինն այս տեղեկության կապակցությամբ նշել է․ «Ուկրաինական պատվիրակությունն Ուկրաինա վերադարձի ճանապարհին է, իսկ ZN.UA-ն պատվիրակության կազմում աղբյուրներ չունի»։

ՌԴ նախագահի հատուկ ներկայացուցիչ Կիրիլ Դմիտրիևի ներկայացուցիչը, իր հերթին, եռակողմ բանակցությունների պլանավորման մասին հաղորդումները «ֆեյք» է անվանել։

Նախօրեին Reuters գործակալությունը հայտնել էր, որ Դմիտրիևը չորեքշաբթի մեկնել է ԱՄՆ՝ Ուիթքոֆի, Քուշների և Սպիտակ տան այլ ներկայացուցիչների հետ բանակցությունների համար։ Գործակալության աղբյուրների խոսքով՝ ԱՄՆ նախագահի բանագնացների հետ խորհրդակցությունները շարունակությունն են սեպտեմբերին Կրեմլում Ռուսաստանի նախագահ Վլադիմիր Պուտինի հետ նրանց հանդիպման։

ԱՄՆ պետքարտուղար Մարկո Ռուբիոն չորեքշաբթի Ռուսաստանի արտաքին գործերի նախարար Սերգեյ Լավրովի հետ հանդիպումից հետո լրագրողներին ասել էր, որ և՛ Մոսկվան, և՛ Կիևը հետաքրքրություն են ցուցաբերել սահմանափակ հրադադարի գաղափարի նկատմամբ, որը կտարածվեր հացահատիկային և էներգետիկ ենթակառուցվածքների օբյեկտների վրա։