03.11.2026 | 23:29
Թրամփը հայտարարել է, որ ԱՄՆ-ը կդադարեցնի Իսրայելին տարեկան 4 միլիարդ դոլարի օգնության տրամադրումը
Turkish Airlines-ն ու թուրքական այլ ավիաընկություններ չեղարկել են դեպի Իրան չվերթները՝ ԱՄՆ պատժամիջոցների պատճառով
Քաղաքականություն
22.09.2026 | 15:20
Թուրքիայի ազգային ավիափոխադրող Turkish Airlines-ն ու բյուջետային AJet և Pegasus ավիաընկերությունները սեպտեմբերի 21-ից չեղարկել են դեպի Իրան և հակառակ ուղղությամբ չվերթները՝ ԱՄՆ պատժամիջոցների ուժի մեջ մտնելու պատճառով, գրում է Middle East Eye-ը:
Turkish Airlines-ի և AJet-ի կայքերը մինչև մարտ Իրան չվերթներ չեն իրականացնի, մինչդեռ Pegasus-ը հեռացրել է բոլոր չվերթներն իր ամրագրման համակարգից։
Turkish Airlines-ի ներկայացուցիչը Iran International-ին ասել է, որ չկա որևէ երաշխիք, որ չվերթները կվերսկսվեն նույնիսկ 2027 թվականի մարտից հետո։
Խնդրին ծանոթ աղբյուրը MEE-ին հայտնել է, որ Իրանի ավիացիոն ոլորտի նկատմամբ ԱՄՆ Ֆինանսների նախարարության սահմանած պատժամիջոցներն այնքան խիստ են, որ թուրքական ավիաընկերությունները ստիպված են եղել դադարեցնել իրենց թռիչքները։
Աղբյուրը նշել է, որ թեև ամերիկյան արտադրության ինքնաթիռների (օրինակ՝ Boeing-ի) նկատմամբ սահմանափակումները հասկանալի էին, նոր պատժամիջոցները խոչընդոտում են նաև Airbus-ի ինքնաթիռների թռիչքներին դեպի Իրան, քանի որ դրանք պարունակում են ամերիկյան արտադրության բաղադրիչներ։ Աղբյուրը նշել է, որ փոխադրողներն այլ ընտրություն չունեին։ Թուրքիայից պաշտոնյան էլ հայտնել է, որ երկուշաբթիի դրությամբ՝ Mahan Air-ը միակ իրանական ավիաընկերությունն է, որին արգելվել է թռիչքներ իրականացնել դեպի Թուրքիա, մինչդեռ մյուս իրանական ավիաընկերություններին առայժմ թույլատրվում է շարունակել երկու երկրների միջև չվերթները։
Թուրքիան և Իրանը կայուն հարաբերություններ են պահպանում և ունեցել են լայնածավալ էներգետիկ ու առևտրային կապեր՝ չնայած Թեհրանի նկատմամբ ԱՄՆ-ի կողմից սահմանված պատժամիջոցների հաջորդական փուլերին։ Սակայն Թուրքիայի նախագահ Ռեջեփ Թայիփ Էրդողանը փոխել է իր մոտեցումը այն բանից հետո, երբ ԱՄՆ նախագահ Դոնալդ Թրամփը սկսել է ուժեղացնել Իրանի նկատմամբ տնտեսական ճնշումը։
Հանգստյան օրերին էլ Թուրքիան չեղարկել է Իրանի Mellat բանկի գործունեության լիցենզիան։ Բանկը երկրում գործել է տասնամյակներ շարունակ։ Բացի այդ, Թուրքիայի բանկային համակարգը կարգավորող մարմինն անցած շաբաթ իր վերահսկողության տակ է վերցրել Golden Global Investment Bank-ը՝ այն բանից հետո, երբ ԱՄՆ-ը պատժամիջոցներ էր սահմանել այս ֆինանսական հաստատության նկատմամբ՝ Իրանի կառավարությանը միջոցներ փոխանցելու մեղադրանքով։
Թարգմանությունը՝ Էմմա Չոբանյանի
