Հայտնի է, թե որ նախարարություններն են իրար միանալու. Նիկոլ Փաշինյանի կաբինետում խուճապ է

Կառավարությունում արդեն կա այն նախագծի նախնական տարբերակը, որով պետք է փոփոխություններ լինեն «Կառավարության կառուցվածքի և գործունեության մասին» Հայաստանի Հանրապետության օրենքում, որն էլ ենթադրում է  նախարարությունների թվի կրճատում:

Այսպիսով. մեր աղբյուրների փոխանցմամբ՝ միավորվելու են գյուղատնտեսության, էներգետիկ ենթակառուցվածքների և բնական պաշարների ու տնտեսական զարգացման և ներդրումների նախարարությունները:

Երկրորդ բլոկով միավորվելու են մշակույթի, սպորտի և երիտասարդության հարցերի ու կրթության և գիտության նախարարությունները:

Առողջապահության ու աշխատանքի և սոցիալական հարցերի նախարարություններն իրար հետ են միավորվելու, այս պահին քննարկումների արդյունքում էլ նախատեսված է սփյուռքի և արտաքին գործերի նախարարությունների միավորումը: Հավանական է, որ սփյուռքի նախարարությունը կդառնա ԱԳՆ-ի մի բաժին կամ վարչություն:

Այս հաշվարկներով՝ առկա 17 նախարարությունների թիվը նվազում է՝ դառնալով 11:

Կառավարության աշխատակազմից այս տեղեկությունների վերաբերյալ մեզ փոխանցեցին, որ պաշտոնապես հայտարարելու համար որևէ բան չունեն, նախագիծը դեռ պատրաստ չէ:

Հիշեցնենք, որ Նիկոլ Փաշինյանը ևս նախարարությունների կրճատմանն անդրադարձել էր և ասել. «Չեմ ուզում թաքցնել. մենք ոչ թե խնդիր ունենք կրճատելու, այլ խնդիր ունենք կառավարման համակարգի արդյունավետությունը բարձրացնելու: Այսօր մեր նախարարությունների թիվը շատ ավելին է, քան մենք օբյեկտիվորեն ունենք դրա անհրաժեշտությունը: Այո՛, մեր քաղաքական ընկալումն այն է, որ մեր նախարարությունների թիվը պետք է շոշափելիորեն կրճատվի»:

Տեղեկացանք նաև, որ նախարարությունների կրճատման այս գաղափարը խուճապի է մատնել որոշ պաշտոնյաների: Մասնավորապես, ոմանք գիտեն, որ իրենք այլևս չեն լինելու գործադիրում, իսկ մի մասն էլ, որ համեմատաբար լավ է աշխատել այս 6-7 ամիսների ընթացքում, ցանկանում է ամրապնդվել կառավարությունում: Պատճառն այն է, որ նախարարությունների միավորմամբ կառույցներն ավելի ազդեցիկ են դառնում, ինչպես նաև բյուջեն է եռապատկվում:

Հայկ Վարդանյան