Հեղաշրջման մեջ մեղադրվող Ալիևի աշխատակազմի նախկին ղեկավարի դատավարությունն է մեկնարկել

Այսօր Բաքվի ծանր հանցագործությունների դատարանում տեղի է ունեցել Ադրբեջանի նախագահ Իլհամ Ալիևի աշխատակազմի նախկին ղեկավար Ռամիզ Մեհիդևի և նրա նախկին օգնական Էլդար Ամիրովի դեմ հարուցված քրեական գործով դատական նախապատրաստական նիստը։ Ադրբեջանական լրատվամիջոցների հաղորդմամբ՝ դատավոր Մուրադ Ասլանովի նախագահությամբ անցկացված նիստում ճշտվել են մեղադրյալների անձնական տվյալները, նրանց բացատրվել են օրենսդրությամբ նախատեսված դատավարական իրավունքներն ու պարտականությունները։

Հիշեցնենք, որ 2025 թվականի հոկտեմբերին Ռամիզ Մեհդիևի նկատմամբ Ադրբեջանի պետական անվտանգության ծառայությունում քրեական գործ է հարուցվել։ Նրան մեղադրանք է առաջադրվել Քրեական օրենսգրքի 193-1.3.2-րդ հոդվածով (հանցավոր ճանապարհով ձեռք բերված գույքի օրինականացում), 274-րդ հոդվածով (պետական դավաճանություն) և 278.1-րդ հոդվածով (իշխանությունը բռնի զավթելուն կամ պետության սահմանադրական կարգը բռնի կերպով փոխելուն ուղղված գործողություններ)։

Ավելի վաղ հաղորդվել էր, որ Պետանվտանգության ծառայության կողմից Ադրբեջանի անվտանգության, ազգային շահերի դեմ օտարերկրյա հատուկ ծառայությունների կողմից սադրիչ և ապակառուցողական գործողությունները կանխելու համար ձեռնարկված համապարփակ միջոցառումների արդյունքում առաջացել են հիմնավոր կասկածներ, որ Ռամիզ Մեհդիևը,  Աբբաս Աբբասովը, Ալի Քերիմլին և ուրիշներ կատարել են իշխանության բռնի զավթման և պետության սահմանադրական կարգի բռնի փոփոխությանն ուղղված գործողություններ։

Ռամիզ Մեհդիևը երկար տարիներ զբաղեցրել է Ադրբեջանի պետական կառավարման համակարգի բարձրագույն պաշտոններից մեկը։ 1995 թվականից մինչև 2019 թվականը՝ շուրջ 25 տարի, նա ղեկավարել է նախագահի աշխատակազմը։ Նա այս պաշտոնից ազատվել է 2019 թվականի հոկտեմբերի 23-ին՝ նախագահ Իլհամ Ալիևի հրամանագրով։

Նույն օրը նա նշանակվել է Ադրբեջանի Գիտությունների ազգային ակադեմիայի նախագահ։ 2019–2022 թվականներին ղեկավարել է ակադեմիան։

Նախագահի աշխատակազմից հեռանալուց հետո Մեհդիևը նշանակվել էր Անվտանգության խորհրդի անդամ։ Քրեական գործի հարուցումից մի քանի օր անց՝ 2025 թվականի հոկտեմբերի 18-ին, նա նախագահի հրամանագրով ազատվել է խորհրդի անդամի պաշտոնից։ Նա դեռ խորհրդային տարիներին աշխատել է պետական և կուսակցական կառույցներում, իսկ անկախության շրջանում ղեկավարել է նախագահի աշխատակազմը Հեյդար Ալիևի, այնուհետև՝ Իլհամ Ալիևի պաշտոնավարման տարիներին։

Թարգմանությունը՝ Էմմա Չոբանյանի