24.02.2026 | 23:39
Հայաստանի մի շարք հասցեներում էլեկտրաէներգիայի անջատումներ կլինեն
Քաղաքական ուժերը միլիոններ չեն խնայում. ՀՀԿ-ն քարոզարշավին ծախսել է 114 մլն, «Իմ քայը»՝ 94 մլն, ԲՀԿ-ն՝ 70 մլն
Քաղաքականություն
07.12.2018 | 20:43
Ազգային ժողովի արտահերթ խորհրդարանական ընտրություններին մասնակցող քաղաքական ուժերը ջանք, իսկ ոմանք էլ միլիոններ չեն խնայում իրենց քարոզարշավը ճոխ անցկացնելու համար: Ամենաշատ գումարները ծախսել են «Իմ քայլը» դաշինքը, Հանրապետական կուսակցությունը և ԲՀԿ-ն:
Նշենք, որ «Ընտրական օրենսգրքի» համաձայն՝ քաղաքական ուժերը քարոզչանյութեր պատրաստելու և տարածելու համար 500 մլն դրամից ավել գումար ծախսելու իրավունք չունեն:
Տեղեկացնենք, որ այս գումարի շրջանակներում քաղաքական ուժերը հեռուստաընկերություններից եթերաժամեր են պատվիրել, տպագրել են իրենց նախընտրական պլակատները և վճարել են գովազդային վահանակների համար:
Այսպիսով. դեկտեմբերի 5-ը ներառյալ «Իմ քայլը» դաշինքի նախընտրական հիմնադրամում եղել է 136 մլն դրամ, որից ծախսվել է 94 մլն դրամը:
ՀՀԿ-ն 124 մլն դրամից ծախսել է 114 մլն դրամից ավելի գումար:
Շռայլությամբ երրորդ տեղում Գագիկ Ծառուկյանի «Բարգավաճ Հայաստան» կուսակցությունն է: Նախընտրական հիմնադրամում առկա 80 մլն դրամից դեկտեմբերի 5-ի դրությամբ այս ուժը ծախսել է 70 մլն դրամը:
«Դաշնակցություն» կուսակցությունը ԿԸՀ ներկայացրած տեղեկանքում նշել է, որ քարոզչական ծախսերի համար նախատեսել է 33 մլն դրամ, բայց ծախսել է 29 մլն դրամը:
Մյուս «փողատեր» ուժը «Լուսավոր Հայաստան» կուսակցությունն է՝ 24 մլն դրամով, որից ծասել է 17 մլն դրամը:
«Մենք» կուսակցությունների դաշինքը 20 մլն-ից քարոզարշավի համար ծախսել է մոտ 9 մլն դրամը:
«Սասնա ծռեր» համահայկական կուսակցությունը 10 մլն-ից 9 մլն-ի շրջանակներում է քարոզարշավ իրականացրել:
ՕԵԿ-ը՝ 7 մլն-ից ծախսել է 6,5 մլն-ը:
Քարոզարշավի ծախսերի համար 5 մլն դրամ է հատկացրել «Քաղաքացու որոշում» սոցիալ դեմոկրատական կուսակցությունը, սակայն ծախսել է 3 մլն դրամը:
«Քրիստոնեական ժողովրդավարական վերածնունդ» կուսակցությունը իր նախընտրական հիմնադրամում առկա 2,5 մլն-ից 1,5 մլն-ն է ծախսել:
Ամենահամեստ քարոզարշավն իրականացնում է «Ազգային առաջընթաց» կուսակցությունը: Այս կուսակցության նախընտրական հիմնադրամում դեկտեմբերի 5-ի դրությամբ եղել է 600 դրամ, իսկ մինչ այդ ծախսվել է 489 հազար 400 դրամ:
Այս թվերն աճելու են, քանի որ սրանց է գումարվելու նաև դեկտեմբերի 6-ին և 7-ին կատարված ծախսերի գումարը: Դեկտեմբերի 5-ի դրությամբ բոլոր քաղաքական ուժերը միասին ծախսել են 355 մլն դրամ:
Նշենք, որ դեկտեմբերի 8-ը լռության, իսկ 9-ն էլ ընտրության օրեր են:
Հայկ Վարդանյան
