ԵՄ-ն նոր պատժամիջոցներ կսահմանի ՌԴ-ի նկատմամբ՝ Ուկրաինայի օկուպացված տարածքներում ընտրությունների հետ կապված

Եվրամիությունը Ռուսաստանում Պետդումայի ընտրություններից հետո նոր պատժամիջոցներ է նախապատրաստում։ Սահմանափակումների տակ կհայտնվեն Ուկրաինայի օկուպացված տարածքներում քվեարկության կազմակերպիչներն ու թեկնածուները, ինչպես նաև այն անձինք, որոնց Եվրոպան համարում է Ռուսաստանի ներսում ազատ ընտրությունների խաթարմանը մասնակցություն ունեցած։ Այս մասին ասվում է ԵՄ խորհրդի կայքում հրապարակված հայտարարության մեջ, որը հրապարակել է եվրոպական դիվանագիտության ղեկավար Կայա Կալլասը։

Սեպտեմբերի 18-20-ը կայացած ընտրությունները ցույց տվեցին «Ռուսաստանում ժողովրդավարության շարունակվող և խորացող քայքայումը», իսկ «Յաբլոկո» կուսակցության թեկնածուների հեռացումը էլ ավելի սահմանափակեց ռուսաստանցիների ընտրությունը։ ԵՄ հայտարարության մեջ ընդգծվում է, որ «Յաբլոկոն» շարունակում է մնալ «Ռուսաստանի վերջին ընդդիմադիր ուժերից մեկը» և հակապատերազմական ծրագրով միակ կուսակցությունը, ասվում է հայտարարությունում։

«Ռուսաստանում ժողովրդավարությունից միայն տեսանելիությունն է մնացել»,- նշել է Կալլասը։

Բրյուսելն առանձին ընդգծել է, որ չի ճանաչում ո՛չ քվեարկությունը, ո՛չ էլ ընտրությունների արդյունքները Դոնեցկի, Լուգանսկի, Զապորոժիեի և Խերսոնի մարզերի օկուպացված տարածքներում։

Ասվում է, որ, այսպես կոչված, «ընտրությունները» Ռուսաստանի կողմից միջազգային իրավունքի, այդ թվում՝ ՄԱԿ-ի կանոնադրության, ինչպես նաև Ուկրաինայի անկախության, ինքնիշխանության և տարածքային ամբողջականության հերթական կոպիտ խախտման դրսևորումն են։

Հայտարարության մեջ նաև նշվում է, որ Ռուսաստանն ընտրություններին չի հրավիրել ԵԱՀԿ դիտորդներին՝ այդպիսով ընտրողներին զրկելով անկողմնակալ և անկախ գնահատական ստանալու հնարավորությունից։

Թարգմանությունը՝ Էմմա Չոբանյանի