Հասարակություն
18.09.2026 | 15:58
ԱԺ «Քաղաքացիական պայմանագիր» խմբակցության պատգամավոր Լյուդվիգ Գյուլնազարյանը լրագրողների հետ զրույցում պարզաբանեց իրենց փողոցում ազդանշան տալն արգելող ճանապարհային նշան տեղադրելու շուրջ առաջացած աղմուկը։
Պատգամավորի խոսքով՝ ինքն այդ նշանը տեղադրելու հետ որևէ առնչություն չունի, սակայն չի էլ առարկում բնակիչների քայլին։ Նա նշեց, որ Իսահակ Գասպարյան փողոցում, որտեղ ինքն է բնակվում, առավոտյան ժամերին ստեղծվում են հսկայական խցանումներ։
«Խցանումների արդյունքում վարորդները փորձում են գյուղի հետադարձ ճանապարհով հասնել աշխատանքի, աերոպորտ կամ Էջմիածին: Այդ ճանապարհով գալիս են, հատվում մայրուղուն, ու անընդհատ ազդանշաններ են տալիս»,- պատմեց Գյուլնազարյանը։
Նա ընդգծեց, որ փողոցում ապրում են ծերեր, երեխաներ և խնամքի կարիք ունեցող մարդիկ, իսկ առավոտյան ժամը 7-ից անընդհատ հնչող ազդանշանները խանգարում են բնակիչների հանգիստը։ Իրավիճակն այնքան էր լարվել, որ վարորդների և բնակիչների միջև նույնիսկ քաշքշուկներ ու վեճեր էին տեղի ունենում։
Անդրադառնալով հարցին, թե արդյոք փորձել է կանոնակարգել իրավիճակն ու հեռացնել ինքնակամ տեղադրված նշանը՝ պատգամավորը պատմեց հարևանների հետ ունեցած զրույցի մասին։
«Գնացի հարևաններիս ասեցի՝ եկեք հանենք: Ասում են․ «Լյուդվիգ ջան, իսկ ի՞նչ ես առաջարկում, հո մեր հետ կռիվ չե՞ս անելու»: Ասացի՝ իհարկե ոչ»,-նշեց Գյուլնազարյանը
Պատգամավորը հավելեց, որ ինքը որևէ մեկին կոչ չի անում ինքնակամ նշաններ տեղադրել, սակայն հասկանում է հարևաններին, որոնք փորձել են ճարահատյալ լուծում գտնել ստեղծված խնդրին։
Մանրամասները՝ տեսանյութում։
Նարեկ Կիրակոսյան
