Ձերբակալվել է նախկին վարչապետ Հովիկ Աբրահամյանի եղբայրը

Պաշտոնատար անձի կողմից պաշտոնեական լիազորությունները չարաշահելու, այդ արարքին օժանդակելու, պաշտոնեական կեղծիք կատարելու և կեղծ փաստաթուղթ օգտագործելու դեպքերի առթիվ ՀՀ հակակոռուպցիոն կոմիտեում իրականացվող քրեական վարույթի շրջանակում ձերբակալվել է ՀՀ նախկին վարչապետ Հովիկ Աբրահամյանի եղբայրը՝ Հենրիկ Աբրահամյանը։

Այս մասին Factor.am-ին հայտնում են Հակակոռուպցիոն կոմիտեից։

Հենրիկ Աբրահամյանը տարբեր տարիներին ղեկավարել է Արտաշատի գինու գործարանը, ապա 1999-2008 թվականներին եղել է Ազգային ժողովի պատգամավոր։

Նրա անունը կապվել է մի շարք բիզնեսների հետ՝ գինու արտադրություն, շինանյութերի արտադրություն, ձկնաբուծություն։ Մասնավորապես՝ «Արտաշատ Վինկոն», «Ջաս-Բետոն Շին», «Մերի Ֆիշ» ընկերությունների հետ։

2018 թվականին Մխչյանի տարածքում հայտնաբերված մեծ քանակությամբ զենք-զինամթերքի գործով Հենրիկ Աբրահամյանը կալանավորվել էր։ 2022 թվականին դատարանը նրան մեղավոր է ճանաչել ապօրինի զենք և ռազմամթերք ձեռք բերելու և պահելու համար, դատապարտել 2 տարվա ազատազրկման, սակայն համաներմամբ նա ազատվել էր պատիժը կրելուց։

Հովիկ Աբրահամյանին և նրա որդուն առնչվող քրեական գործերը

Նշենք, որ այժմ Հովիկ Աբրահամյանի վերաբերյալ քրեական գործը քննվում է դատարան։ Նա մեղադրվում է ձեռնարկատիրական գործունեությանն ապօրինի մասնակցելու, պաշտոնեական լիազորությունները չարաշահելու և անցնելու, ինչպես նաև առանձնապես խոշոր չափերով հանցավոր ճանապարհով ձեռք բերված գույքի օրինականացման մեջ։

Նրա որդին՝ Արտաշատի նախկին քաղաքապետ և նախկին պատգամավոր Արգամ Աբրահամյանը, 2026 թվականի օգոստոսին ձերբակալվել և կալանավորվել է։ Քննչական մարմինը նրան մեղադրում է 2023 թվականի ապրիլին Երևանում Սողոմոն Վլասյանի սպանությունը պատվիրելու համար։

Բացի այդ, ՀՀ նախկին վարչապետն անցնում է ապօրինի ծագում ունեցող գույքի բռնագանձման գործով։ Դատախազությունը պահանջել է Հովիկ Աբրահամյանից և մերձավորներից բռնագանձել 59 անշարժ գույք, 4 տրանսպորտային միջոց, մասնակցություններ 20 ընկերություններում և շուրջ 26 մլրդ դրամի գույք/միջոցներ։

Բացի այդ, առանձին գործով դատարանը 2026-ի հունվարին անվավեր է ճանաչել Մխչյանի 8.9 հա հողամասի օտարման շղթան, որտեղ սկզբում հողամասը վաճառվել էր Արգամ Աբրահամյանին, իսկ հետո նա այն նվիրել էր Հովիկ Աբրահամյանին։

Եվգենյա Համբարձումյան