17.09.2026 | 16:39
Դուք պետք է չլինեք ԿԸՀ նախագահ, վառ արտահայտում եք հավասարակշռության բացակայությունը․ Կարապետյան․ ՏԵՍԱՆՅՈՒԹ
Ֆինլանդիան հավատում է Հայաստանին և հայերի կարողությանը՝ հեռանալու անցյալից․ ՀՀ-ում Ֆինլանդիայի դեսպան․ ՏԵՍԱՆՅՈՒԹ
Քաղաքականություն
17.09.2026 | 13:59
Երևանում ընթացող «Կանայք և գլոբալ անվտանգային ճարտարապետությունը» (ԿԳԱՃ) մտակենտրոնի ամենամյա «Համապարփակ անվտանգություն և դիմակայունություն-2026» խորագրով միջազգային համաժողովի ընթացքում Հայաստանում Ֆինլանդիայի արտակարգ և լիազոր դեսպան Կիրստի Նարինենն անդրադարձավ Հայաստանի անվտանգային համակարգի բարեփոխումներին, ֆիննական մոդելի կիրառմանը, Եվրոպական Միության աջակցությանն ու համապարփակ անվտանգության հայեցակարգին։
Դեսպանն իր խոսքում նշեց, որ Ֆինլանդիան ի սկզբանե գործընկերություն է հաստատել համաժողովի հետ՝ հավատալով Հայաստանի կարողությանը՝ բարեփոխելու սեփական անվտանգային լուծումները։
«Այս տարվա ընթացքում ֆինն փորձագետները՝ ԵՄ ֆինանսավորմամբ, աջակցել են Անվտանգության խորհրդի աշխատակազմին՝ Հայաստանի համար համապարփակ պաշտպանական և անվտանգային համակարգ ձևավորելու գործում»,- հայտարարեց Կիրստի Նարինենը։
Դեսպանի ընդգծմամբ՝ ֆիննական մոդելը եվրոպական առաջատարն է ամբողջ հասարակությանը անվտանգային գործընթացներում ներգրավելու առումով։
Կիրստի Նարինենը շեշտեց, որ համապարփակ անվտանգությունը ենթադրում է հասարակության կենսական գործառույթների պաշտպանություն՝ ժողովրդավարական ինստիտուտների, պետական մարմինների, բիզնեսի, ՀԿ-ների և քաղաքացիների հորիզոնական համագործակցության միջոցով։
«Կանխատեսելիությունն ու կայունությունը պահանջում են լավ գործող ինստիտուտներ, բայց հատկապես՝ ժողովրդավարության, հիմնարար ազատությունների հարգման և ակտիվ քաղաքացիական հասարակության վրա հիմնված հասարակական հավասարակշռություն։ Առանց սրանց անվտանգությունը համապարփակ չէ, կայուն չէ և կանխատեսելի չէ»,- ընդգծեց դեսպանը։
Նա նաև հավելեց, որ դիմակայուն և լավ գործող հասարակությունը խրախուսում է ներդրումները, միջազգային համագործակցությունն ու տնտեսական աճը։
Անդրադառնալով ԵՄ աջակցությանը՝ Ֆինլանդիայի դեսպանը նշեց, որ յուրաքանչյուր երկիր ունի իր առանձնահատկությունները, և այս գործընթացը չի կարող լինել մեխանիկական պատճենում։
«Սա ազգային ուժեղ կողմերը, կարիքներն ու խոցելիությունները սահմանելու մասին է։ Կարևոր է լինել մտավոր առումով ազնիվ և քարտեզագրել խոցելիությունները, քանի որ հակառակորդներն արդեն անում են դա»,- նշեց Նարինենը։
Խոսքի եզրափակիչ հատվածում դեսպանը կարևորել է ռազմավարական ծրագրերից դեպի գործնական քայլեր անցումը՝ շեշտելով. «Մեզ անհրաժեշտ են պատասխանատու առաջնորդներ, ովքեր ցանկություն և կարողություն ունեն ստեղծելու ռազմավարություններ, բայց առավել ևս՝ ռազմավարություններից անցնելու գործողությունների»։
Մանրամասները՝ տեսանյութում։
Եվգենյա Համբարձումյան
