Քաղաքական մազոխիզմով եք զբաղված, հաճույք եք ստանում ՀՀ սուվերեն տարածքները ծվեն-ծվեն անելուց․Դավթյան․ ՏԵՍԱՆՅՈՒԹ

Ազգային ժողովում «Ուժեղ Հայաստան» խմբակցության պատգամավոր Գառնիկ Դավթյանն իր ելույթում գնահատականներ հնչեցրեց իշխող մեծամասնության հասցեին՝ «Քաղաքացիական պայմանագրին» մեղադրելով քաղաքական սադիզմի և մազոխիզմի մեջ։

«Մինչև 2026 թվականի ընտրությունները «Քաղաքացիական պայմանագիր» կուսակցությունը զբաղված էր քաղաքական սադիզմով։ Խոստացել էին, որ հաշվի կնստեն ժողովրդի կարծիքի հետ, բայց արեցին այնպես, որ շատ մեծ աղետ բերեցին, շատ զոհեր ունեցանք ու աններելի կորուստներ։ Իսկ 2026 թվականի ընտրություններից հետո այս նույն իշխանությունը զբաղված է քաղաքական մազոխիզմով։ Հաճույք է ստանում Հայաստանի Հանրապետության սուվերեն տարածքները ծվեն-ծվեն անելուց ու մի ամբողջ ադրբեջանական խոսույթ գեներացնելուց»,- հայտարարեց Դավթյանը։

Պատգամավորը հիշեցրեց 2022 թվականի Պրահայի հայտարարությունը, որով, ըստ նրա, ճանաչվեց Ադրբեջանի տարածքային ամբողջականությունը՝ ներառյալ Արցախը, ինչը հանգեցրեց էթնիկ զտման, ինչպես նաև 2024 թվականին Տավուշից տարածքների հանձնումը։

Ամբիոնից ցուցադրելով 1930-ական թվականների քարտեզները՝ Դավթյանը պնդեց, որ դրանցում ո՛չ Տավուշում կան ադրբեջանական անկլավներ, ո՛չ էլ Տիգրանաշենն է ադրբեջանական տարածք։

«1932 թվականի քարտեզում ո՛չ Տավուշում անկլավներ կան, ո՛չ էլ Տիգրանաշենն է ադրբեջանական տարածք, ինչպես ձեր քաղաքական առաջնորդն է շեշտում։ Դուք ընտրվել եք որպես Հայաստանի ժողովրդի ներկայացուցիչ, ինչո՞ւ չեք պաշտպանում հայ ժողովրդի պետական և ազգային շահը»,- ասաց ընդդիմադիր պատգամավորը։

Մանրամասները՝ տեսանյութում։

Անի Թամրազյան