Սիսիանի «Մայիսի 28» զբոսայգու 10-րդ հողամասը վերադարձվել է համայնքին

Դատախազական ներգործության արդյունքում Սիսիանի «Մայիսի 28» զբոսայգում գտնվող ևս մեկ՝ 0,03 հա մակերեսով հողամաս վերադարձվել է համայնքի տիրապետմանը։ Ընդհանուր առմամբ՝ այգում 8 անձի տրամադրված 10 հողատարածք՝ 5234,48 քմ ընդհանուր մակերեսով, արդեն վերադարձվել է համայնքին, իսկ ևս 10 հողատարածքի վերադարձի աշխատանքները շարունակվում են։

«Սյունիքի մարզի դատախազությունը, պետական (համայնքային) շահերի պաշտպանության լիազորության շրջանակում, ուսումնասիրել է Սյունիքի մարզի Սիսիան համայնքի Սիսիան քաղաքի «Մայիսի 28» զբոսայգու տարածքում գտնվող հողամասերը տարբեր անձանց տրամադրելու վերաբերյալ փաստաթղթերը:

Ուսումնասիրության արդյունքում պարզվել է, որ Սիսիան քաղաքի «Մայիսի 28» զբոսայգու տարածքում՝ Սիսականի փողոց 2/1 հասցեում գտնվող՝ 0,03 հա մակերեսով հողատարածքը, օրենքի պահանջների խախտմամբ, կառուցապատման իրավունքով հատկացվել է ֆիզիկական անձի:

Դատախազի կողմից միջնորդագիր է հասցեագրվել Սիսիան համայնքի ղեկավարին՝ Սիսիան համայնքի և կառուցապատողի միջև 2011 թվականի հունիսի 13-ին կնքված կառուցապատման իրավունքը դադարեցնելու ուղղությամբ միջոցներ ձեռնարկելու վերաբերյալ:

Միջնորդագրի հիման վրա, Սիսիանի համայնքապետարանի իրավասու մարմինների կողմից ձեռնարկված միջոցառումների արդյունքում, Կադաստրի կոմիտեում դադարեցվել է Սիսիան համայնքի «Մայիսի 28» զբոսայգում գտնվող՝ 0,03 հա մակերեսով, 563 հազար դրամ շուկայականին մոտարկված կադաստրային արժեքով հողամասի նկատմամբ գրանցված կառուցապատման իրավունքը. հողամասը վերադարձվել է Սիսիան համայնքի տիրապետմանը:

Նշենք, որ Սյունիքի մարզի Սիսիան համայնքի «Մայիսի 28-ի» անվան զբոսայգին զբաղեցնում է 9595.68 քմ տարածք, որտեղ գտնվող հողատարածքները կառուցապատման իրավունքով կնքված պայմանագրերով հատկացվել են 17 անձի:

Դատախազական ներգործության արդյունքում՝ նշված այգում գտնվող հողատարածքներից առ այսօր Սիսիան համայնքին վերադարձվել է 8 անձի տրամադրված 5234,48 քմ մակերեսով 10 հողատարածք: Դրանք են՝

1.     0,03 հա մակերեսով հողատարածքը,

2.    0,03 հա մակերեսով հողատարածքը,

3.    0,05308 հա մակերեսով հողամասը,

4.    0,0450 հա մակերեսով հողամասը,

5.    0,05 հա մակերեսով հողամասը,

6.   0,0451 հա մակերեսով հողամասը,

7.    0,08 հա մակերեսով հողամասը,

8.   0,02 հա մակերեսով հողամասը,

9.   0,0402 հա մակերեսով հողամասը,

10. 0,13 հա մակերեսով հողամասը:

9 անձի տրամադրված 10 հողատարածքները համայնքին վերադարձնելու աշխատանքներն ընթացքի մեջ են»,- ասված է Դատախազության տարածած հաղորդագրությունում։