05.11.2026 | 12:28
Թրամփը ընտրություններում պարտությունից հետո դիտարկում է Պենտագոնի ղեկավարի հնարավոր հեռացումը
Ադրբեջանի համար հակամարտությունն ավարտված է․ Հաջիև
Քաղաքականություն
11.09.2026 | 13:21
Ադրբեջանը կշարունակի ջանքեր գործադրել Հարավային Կովկասում կայուն խաղաղության հաստատման և տեղում ապագա խաղաղության ամրապնդման ուղղությամբ։ Ադրբեջանական լրատվամիջոցների հաղորդմամբ՝ Ստեփանակերտում օտարերկրյա դիվանագետներին ուղղված խոսքում հայտարարել է Ադրբեջանի նախագահի օգնական, նախագահի աշխատակազմի արտաքին քաղաքականության հարցերով վարչության ղեկավար Հիքմեթ Հաջիևը։
Նա ասել է, թե երեք տարի առաջ փակվել է Ղարաբաղյան հակամարտության վերջին էջը, որից հետո Ադրբեջանն ու Հայաստանը թևակոխել են խաղաղության նոր դարաշրջան։
«Ադրբեջանի համար հակամարտությունն ավարտված է։ Մենք սովորում ենք ապրել խաղաղության պայմաններում և շարժվում ենք այդ ուղղությամբ։ Խաղաղությունը պետք է նշանակի ոչ միայն առճակատման բացակայություն, այլև վստահության ամրապնդում, վերականգնում և կառուցում»,- ասել է Հաջիևը։
Նա հայտնել է, որ Ադրբեջանի և Հայաստանի ղեկավարների վերջին հանդիպումն անցել է կառուցողական մթնոլորտում։
«Ես ուրախ եմ, որ Հայաստանի և Ադրբեջանի ղեկավարների միջև վերջին հանդիպումն անցել է շատ կառուցողական մթնոլորտում: Երկու կողմերն էլ պայմանավորվել են սկսել երկկողմ համագործակցություն՝ խաղաղության օրակարգն առաջ մղելու, երկու երկրների միջև վստահությունն ամրապնդելու և առևտրային կապերը զարգացնելու համար, ներառյալ՝ երկու երկրների միջև և ավելի լայն տարածաշրջանում տրանսպորտային կապերն ու հաղորդակցությունը»,- նշել է Հիքմեթ Հաջիևը:
Անդրադառնալով TRIPP նախագծին՝ Հաջիևը հույս է հայտնել, որ շինարարական աշխատանքները կավարտվեն մոտ ապագայում։ Նա հայտնել է, որ Ադրբեջանի տարածքում երկաթուղու և ավտոմայրուղու շինարարությունը գրեթե ավարտված է, իսկ ամբողջ նախագիծը նախատեսվում է ավարտին հասցնել ընթացիկ տարվա վերջին կամ հաջորդ տարվա ընթացքում։
«Այժմ մեր ջանքերն ուղղում ենք այս նախագծի Նախիջևանի հատվածի իրականացմանը։ Մենք նաև դրական ազդակներ ենք ստանում Եվրամիության և այլ պետությունների գործընկերներից, որոնք պատրաստակամություն են հայտնում աջակցելու Նախիջևանի վերականգնման և վերակառուցման մեր ջանքերին»,- ասել է Ադրբեջանի նախագահի օգնականը։
Նրա խոսքով՝ նախագծի իրականացումը կապահովի նոր տրանսպորտային կապ ոչ միայն տարածաշրջանի, այլև Եվրասիական մայրցամաքի ավելի լայն հատվածի համար՝ ամրապնդելով Արևելք-Արևմուտք և Միջին միջանցքի երթուղիները։
«Սա կփոխի մեր տարածաշրջանի ամբողջ կառուցվածքը և միաժամանակ կապահովի Հայաստանի ինտեգրումը տարածաշրջանային գործընթացներին»,- ընդգծել է Հաջիևը։
Հավելենք, որ Բաքուն հավատարմագրված օտարերկրյա դիվանագիտական կորպուսի ներկայացուցիչների այցն է կազմակերպել Արցախի շրջաններ։ Ադրբեջանական լրատվամիջոցների հաղորդմամբ՝ Ստեփանակերտում նրանք ծանոթացել են երկաթուղային և ավտոկայարանային համալիրում իրականացվող շինարարական աշխատանքների ընթացքին, այցելել քաղաքի մշակույթի կենտրոն և, այսպես կոչված, «Հաղթանակի զբոսայգի»։
Թարգմանությունը՝ Էմմա Չոբանյանի
