ԱԴԾ-ն ձերբակալել է Մոսկվայում Մեծ Բրիտանիայի դեսպանատան անվտանգության աշխատակցին՝ պետական դավաճանության մեղադրանքով

ՌԴ ԱԴԾ-ն հայտարարել է Մոսկվայում Մեծ Բրիտանիայի դեսպանատան անվտանգությունն ապահովող կազմակերպության աշխատակցի ձերբակալության մասին: Նրա դեմ քրեական գործ է հարուցվել Ռուսաստանի Քրեական օրենսգրքի 275-րդ հոդվածով (պետական ​​դավաճանություն), գրում է Meduza-ն։

Ըստ ԱԴԾ-ի՝ ձերբակալվածը տեղեկություններ է հավաքել դեսպանատան աշխատակիցների մասին, այդ թվում՝ նրանց հասցեների, հանդիպումների և ուղևորությունների։ Նա նաև ուսումնասիրում էր դիվանագիտական ​​​​ներկայացուցչության անվտանգության համակարգի և այնտեղ անցկացվող միջոցառումների վերաբերյալ տվյալները։

Հատուկ ծառայության պաշտոնյաները պնդում են, որ անվտանգության աշխատակիցը գործել է Ուկրաինայի անվտանգության ծառայության շահերից ելնելով։ Նրանց խոսքով՝ տղամարդը հրահանգներ է ստացել ուկրաինացի բլոգեր Դմիտրի Կարպենկոյից, որը հայտնի է որպես «Առաքյալ»։

Նշվում է, թե Ուկրաինայի անվտանգության ծառայությունը, ենթադրաբար, մտադիր էր օգտագործել ստացված տեղեկատվությունը՝ Մեծ Բրիտանիայի դեսպանի և այլ դիվանագետների դեմ դիվերսիաներ ու ահաբեկչական հարձակումներ ծրագրելու համար: Կիևը պլանավորում էր այդ հարձակումների պատասխանատվությունը բարդել Մոսկվայի վրա: Դա «Մեծ Բրիտանիային կներքաշեր Ռուսաստանի հետ ուղղակի զինված հակամարտության մեջ և թույլ կտար Ուկրաինային ձեռք բերել լրացուցիչ զենք», պնդում է ԱԴԾ-ն:

Նախօրեին Լոնդոնի ոստիկանությունը հայտնել էր Մեծ Բրիտանիայի բնակիչ Ջոշուա Քեմիջի ձերբակալության մասին: Նրան մեղադրում են Ազգային անվտանգության մասին օրենքը խախտելու և կասկածում ռուսական հետախուզության հետ համագործակցելու մեջ:

Թարգմանությունը՝ Էմմա Չոբանյանի