Քաղաքականություն
09.09.2026 | 20:47ԱԺ «Ուժեղ Հայաստան» խմբակցության պատգամավոր Էդգար Ղազարյանը Factor TV-ին տված հարցազրույցում պնդում է՝ ՔՊ խմբակցության պատգամավոր Ծովինար Վարդանյանի կողմից իրեն ընդունելության չարժանացնելը կարող է քրեական պատասխանատվության հիմք դառնալ։ Նրա խոսքով՝ ինքը Վարդանյանի դեմ հաղորդում է ներկայացրել՝ պնդելով, որ իրեն քաղաքական հայացքներով պայմանավորված խտրական վերաբերմունքի են արժանացրել։
«Ես գլխավոր դատախազին հաղորդում էի ներկայացրել: Քննչական կոմիտեն մերժել էր վարույթ նախաձեռնել, բողոքարկել եմ դատախազություն, դատախազությունն էլ է մերժել, դիմել եմ դատարան, շահել եմ. առաջին ատյանը պարտավորեցրել է վարույթ նախաձեռնել: Իրենք բողոքարկել են վերաքննիչ դատարան, դարձյալ շահել եմ, դատախազությունը դա բողոքարկել է վճռաբեկ դատարան, շահել եմ և հիմա իրավունքի ուժով` Վճռաբեկ դատարանի որոշմամբ, պետք է նախաձեռնվի քրեական վարույթ»,- ասաց Ղազարյանը:
Նրա խոսքով՝ եթե վարույթը նախաձեռնվի, Ծովինար Վարդանյանը սկզբում կարող է ներգրավվել որպես վկա, սակայն հետագայում, եթե քննությամբ մեղադրանքի հիմքեր հաստատվեն, նրան որպես մեղադրյալ ներգրավելու համար անհրաժեշտ կլինի Ազգային ժողովի համաձայնությունը։
Ղազարյանը պնդում է՝ նույն խնդիրը վերաբերում է նաև պատգամավորներ Արմեն Խաչատրյանին և Ռուբեն Ռուբինյանին։ Նրա խոսքով՝ կան նաև այլ պատգամավորներ, որոնց կողմից իրեն ընդունելության չարժանացնելու դեպքերով ինքը դիմել է դատարան։
Ղազարյանն ընդգծեց, որ խոսքը քրեական օրենսգրքով նախատեսված խտրական վերաբերմունքի մասին է:
Մանրամասները` տեսանյութում:
Արփի Հակոբյան
