Բաքուն Սոթքի հանքավայրի ադրբեջանական հատվածում իրականացրել է առաջին հորատապայթեցման աշխատանքները

Ադրբեջանի պետական AzerGold հանքարդյունաբերական ընկերությունն առաջին հորատման և պայթեցման աշխատանքներն է իրականացրել  Սոյուդլուի (Զոդ) ոսկու հանքավայրում։ Այս մասին տեղեկությունը հրապարակվել է ընկերության կայքում, գրում են ադրբեջանական լրատվամիջոցները։

Հավելենք, որ Բաքուն այսպես է անվանում է Սոթքի հանքավայրը, որի մի մասը գտնվում է ադրբեջանական կողմի վերահսկողության տակ։

Նշվում է, որ հորատապայթեցման աշխատանքներն իրականացվել են վերահսկման պայմաններում։ Աշխատանքների մեկնարկից առաջ սահմանվել է անվտանգության գոտի, տրվել են նախազգուշական ազդանշաններ և ձեռնարկվել են տարածքի վերահսկողության համար անհրաժեշտ բոլոր միջոցները։ Պայթյուններից հետո մասնագետները զննել են տարածքը՝ դրա անվտանգությունը հաստատելու համար։ Այս աշխատանքները կարևոր փուլ են հանքավայրի ակտիվ արդյունահանման մեկնարկին նախապատրաստվելու ճանապարհին։

Հաղորդվում է, որ 2025 թվականի օգոստոսից  հանքում  իրականացվել են լայնածավալ երկրաբանական ուսումնասիրություններ, տեղագրական նկարահանում և հորատման աշխատանքներ:  Ըստ գնահատականների՝ արդյունահանման ենթակա ոսկու մնացորդային պաշարները կազմում են 1,03 միլիոն ունցիա։

Հանքավայրի զարգացմանը զուգահեռ աշխատանքներ են տարվում հանքաքարի վերամշակման լուծումների մշակման ուղղությամբ: Նշվում է, որ հանքաքարի հանքաբանական և մետալուրգիական բնութագրերի, ինչպես նաև փորձարկման արդյունքների հիման վրա, սկզբնական վերամշակման փուլի համար ընտրվել է ֆլոտացիոն տեխնոլոգիա: Ներկայումս իրականացվում են  տեխնիկատնտեսական ուսումնասիրություններ՝ ժամանակակից ֆլոտացիոն վերամշակման համալիրի ներուժը որոշելու համար:

Ներկայումս նախագծում ներգրավված է 236 մարդ։ Ըստ ադրբեջանական կողմի՝ նրանցից 55-ը Քարվաճառի շրջանի գրանցված բնակիչներ են։ Տեղական կադրերի սահմանափակ լինելու պատճառով հանքարդյունաբերության ոլորտում մասնագիտացված որակավորում և փորձ պահանջող պաշտոններում աշխատանքի են ներգրավվել այլ շրջաններից ժամանած որակավորված մասնագետներ։

Նշենք, որ Սոթքի ոսկու հանքավայրի մի մասը Արցախյան 44-օրյա պատերազմից հետո գտնվում է Ադրբեջանի վերահսկողության տակ։ Հանքը դեռևս ԽՍՀՄ տարիներին ամբողջությամբ շահագործել է Հայաստանը, այն հանդիսացել է ՀԽՍՀ սեփականությունը։

Թարգմանությունը՝ Էմմա Չոբանյանի