Ուկրաինական ԱԹՍ-ների հարձակման հետևանքով Պերմում բնակելի շենք է վնասվել․ կա զոհ․ ՏԵՍԱՆՅՈՒԹ

Ուկրաինական անօդաչու թռչող սարքերը հարձակվել են Ռուսաստանի մի քանի շրջանների վրա, այդ թվում՝ Պերմի երկրամասի և Ռոստովի մարզի վրա, գրում է Current time-ը։

Ուկրաինական մոնիթորինգային տելեգրամ ալիքներ Exilenova+ և Supernova+-ը հայտնել են, որ անօդաչու թռչող սարքը հարվածել է Պերմի բազմահարկ շենքին։ Լուսանկարներում և տեսանյութերում երևում են շենքի վերին հարկերում բռնկված հրդեհի հետևանքները։

Supernova+-ը նաև հաղորդում է, որ հարվածի թիրախը Պերմի նավթավերամշակման գործարան «Լուկօյլ-Պերմնեֆտեորգսինտեզն» է, որը բազմիցս ենթարկվել է ուկրաինական անօդաչու թռչող սարքերի հարձակմանը: Այս նավթավերամշակման գործարանը Ռուսաստանի ամենամեծերից մեկն է: Դրա տարեկան հզորությունը գերազանցում է 13 միլիոն տոննա նավթ, և նավթամթերքի ավելի քան 50%-ը արտահանվում է։

Պերմի երկրամասի նահանգապետ Դմիտրի Մախոնինը հայտնել է, որ տարածաշրջանի վրա խոցվել է 27 անօդաչու թռչող սարք, վնասել է բնակելի շենք: Նա նաև հայտնել է, որ մեկ մարդ զոհվել է, իսկ չորսը՝ վիրավորվել:

Exilenova+–ը հրապարակել է NASA-ի FIRMS ծառայության լուսանկարը, որտեղ, ըստ ալիքի տվյալների, արձանագրվել է Տագանրոգի ավիաբազայում բռնկված հրդեհ։ Այս տեղեկությունը դեռևս անկախ աղբյուրներով հաստատված չէ։

Ռոստովի մարզի նահանգապետ Յուրի Սլյուսարը սեպտեմբերի 7-ի առավոտյան հայտնել էր, որ օդային հարձակումը հետ մղելու ընթացքում մոտ 25 անօդաչու սարք է ոչնչացվել Նովոշախտինսկ քաղաքում և մարզի յոթ շրջաններում՝ Ազովի, Չերտկովի, Շոլոխովի, Միլերովի, Վերխնեդոնսկի, Կաշարի և Ուստ-Դոնեցկի շրջաններում։

«Տուժածների և գետնի վրա ավերածությունների մասին տեղեկություններ չեն ստացվել։ Տեղեկությունը դեռ ճշտվում է»,- գրել է նա։

ՌԴ ՊՆ-ն հայտարարել է, որ Բելգորոդի, Բրյանսկի, Վոլգոգրադի, Վորոնեժի, Կուրսկի, Լիպեցկի, Նիժնի Նովգորոդի, Օրյոլի, Ռոստովի, Սամարայի, Սարատովի, Տամբովի և Ուլյանովսկի մարզերի, բռնակցված Ղրիմի, Թաթարստանի, Ուդմուրտիայի, Չուվաշիայի,Պերմի երկրամասի, ինչպես նաև Ազովի և Սև ծովերի ջրերի վրա  որսացել և խոցել է ուկրաինական 306 անօդաչու թռչող սարք։