27.09.2026 | 09:01
Համաշխարհային օլիմպիադա. Հայաստանի հավաքականների մրցակիցները վերջին տուրում
OpenAI-ը թողարկել է GPT-6-ը՝ իր մինչ օրս ամենահզոր ԱԲ մոդելը
Հաղորդաշարեր
04.09.2026 | 21:16
OpenAI-ը թողարկել է GPT-6 Astra-ն, որը ընկերությունը անվանում է իր մինչ օրս ամենահզոր մոդելը: Ընկերությունը նշում է, որ մշակումն միավորել է նախնական ուսուցման, ամրապնդման միջոցով ուսուցման և մոդելի վարքագիծը օգտատիրոջ մտադրություններին համապատասխանեցնելու ոլորտներում տարիների ընթացքում իրականացված հետազոտությունները, գրում է The Insider-ը։
Ընկերության հաղորդմամբ՝ Astra-ն ռեկորդային արդյունքներ է ցույց տալիս համակարգչի և բրաուզերի հետ փոխազդեցության, ինչպես նաև ծրագրային ապահովման մշակման, կիբերանվտանգության, գիտության և այլ մասնագիտական առաջադրանքների ոլորտներում։
Մոդելը FrontierMath Tier 4 թեստում 98% արդյունք է ցույց տվել։ OpenAI-ի տվյալներով՝ այն արդեն օգնել է լուծել մաթեմատիկական մի քանի վաղուց չլուծված խնդիրներ։
ARC-AGI-3 բենչմարքում, որը ստուգում է անծանոթ ինտերակտիվ խնդիրների լուծման ընթացքում արհեստական բանականության սովորելու ունակությունը, Astra-ն հավաքել է 99,9%։ Համեմատության համար՝ մարդ-փորձարկողի միջին արդյունքը 48% է։
ARC Prize Foundation-ի նախագահ Գրեգ Կամրադտը հայտարարել է, որ Astra-ն առաջին անգամ հասել է մարդու հետ գործողությունների արդյունավետության մակարդակի հավասարության՝ դա անվանելով «առաջադեմ մոդելների արտադրողականության մեջ նշանակալի տեղաշարժ»։
Առանձին նշվում է, որ ExploitBench թեստում, որը գնահատում է մոդելի՝ հայտնի խոցելիությունները գործող էքսփլոյտների վերածելու կարողությունը, Astra-ն հավաքել է 100%, մինչդեռ նախորդ՝ GPT-5.6 Sol մոդելի արդյունքը կազմել է 78,5%։
OpenAI-ն նշել է, որ թեստավորման ընթացքում Astra-ն ինքնուրույն հայտնաբերել է նախկինում անհայտ՝ զրոյական օրվա (zero-day) խոցելիություն։ Ընկերությունը դրա մասին տեղեկացրել է համապատասխան ծրագրային ապահովման մշակողներին։
Այս ոլորտում մոդելի հնարավորությունների աճի պատճառով, ըստ OpenAI-ի Preparedness Framework համակարգի, այն դասակարգվել է կիբեռռիսկի «կրիտիկական» մակարդակում։ Այդ պատճառով կիբերանվտանգության ոլորտում մի շարք ավելի առաջադեմ առաջադրանքների հասանելիությունը ներկայումս սահմանափակված է։
Ընկերության հաղորդմամբ՝ Astra-ն ավելի հազվադեպ, քան նախորդ մոդելները, դուրս է գալիս դրված առաջադրանքի շրջանակներից և ավելի քիչ է իր հնարավորությունների վերաբերյալ ոչ հավաստի հայտարարություններ անում։
Hugging Face-ի հետ կապված միջադեպի օրինակով վերարտադրված ներքին թեստերից մեկում մոդելը, առանց ստանդարտ պաշտպանական մեխանիզմների, ոչ մի անգամ չի գերազանցել իրեն տրված լիազորությունները։ Մինչդեռ GPT-5.6 Sol-ը նման կերպ վարվել է դեպքերի 48%-ում։
Մոդելն արդեն հասանելի է սահմանափակ թվով կազմակերպությունների համար և առաջիկա օրերին հասանելի կլինի ChatGPT Plus, Pro, Business և Enterprise սակագնային պլանների բոլոր օգտատերերի համար, ինչպես նաև OpenAI API-ի, Microsoft Azure-ի և AWS Bedrock-ի միջոցով։
API-ի միջոցով մոդելին մուտք գործելու արժեքը կազմում է 10 դոլար՝ մեկ միլիոն մուտքային տոկենի համար, և 50 դոլար՝ մեկ միլիոն ելքային տոկենի համար։
OpenAI-ն ավելի վաղ թողարկել էր մոդելի նախորդ տարբերակը՝ GPT-5.5-ը։ Հուլիսին ընկերությունը թողարկել էր 5.6 մոդելների ընտանիքը՝ կենտրոնացած կոդավորման, բազմաքայլ աշխատանքի և կիբերանվտանգության վրա։
Թարգմանությունը՝ Էմմա Չոբանյանի
