13.10.2026 | 23:30
«Կազիմիր Պուլասկի» հիմնադրամի նախագահի հետ քննարկվել են փոխգործակցության հարցեր
Հայաստանի վերաբերյալ այսօրվա որոշումը հստակ ուղերձ է՝ տնտեսական հարկադրանքին բախվելիս ԵՄ-ն կարձագանքի․ Հելեն ՄաքԷնթի
Քաղաքականություն
02.09.2026 | 16:29
«Եվրոպան կանգնած է Հայաստանի և նրա ժողովրդի կողքին, որոնք ընտրել են բարեփոխումների և Եվրոպական միության հետ ավելի սերտ համագործակցության հստակ ուղի»,- Եվրամիությունը նախագահող երկրի՝ Իռլանդիայի արտաքին գործերի և առևտրի նախարար Հելեն ՄաքԷնթին մեկնաբանել է Եվրոպական միության Խորհրդի (Coreper II դեսպանների մակարդակով) որոշումը։
Հիշեցնենք՝ խորհուրդը հավանություն տվեց հայկական ապրանքների համար ժամանակավոր առևտրի ազատականացման միջոցներ սահմանելու Եվրոպական հանձնաժողովի օրենսդրական նախաձեռնությանը։
«Այսօրվա որոշումը հստակ ուղերձ է հղում՝ տնտեսական հարկադրանքին բախվելիս ԵՄ-ն կարձագանքի: Մենք կստեղծենք նոր հնարավորություններ և կկանգնենք մեր գործընկերների կողքին»,- հայտարարել է Իռլանդիայի արտաքին գործերի և առևտրի նախարար Հելեն ՄաքԷնթին։
Հայաստանի տնտեսությանը աջակցելու նման նախաձեռնությունը ԵՄ օրակարգում է՝ Ռուսաստանի կիրառած առևտրային սահմանափակումներից հետո։ Այն նախատեսում է ազատականացնել Հայաստանից ԵՄ արտահանման շուրջ 80%-ը՝ լայն շրջանակի ապրանքների ներմուծման մաքսատուրքերը ժամանակավորապես կասեցնելու միջոցով։
Արտոնյալ ռեժիմը նախատեսված է երկու տարի ժամկետով՝ կանոնակարգի ուժի մեջ մտնելու պահից։
Այսօր ԵՄ Խորհուրդն առանց փոփոխությունների է հավանություն տվել Եվրոպական հանձնաժողովի առաջարկին՝ ճանապարհ հարթելով կանոնակարգի արագ ընդունման համար։
Վաղը՝ սեպտեմբերի 3-ին, Եվրոպական խորհրդարանի Միջազգային առևտրի հանձնաժողովը կանդրադառնա այս օրենսդրական նախաձեռնությանը՝ տալով իր վերջնական եզրակացությունը մինչ պառլամենտի առաջիկա նստաշրջանը։
Ակնկալվում է, որ Եվրոպական խորհրդարանն իր դիրքորոշումն առանց փոփոխությունների կընդունի սեպտեմբերյան լիագումար նստաշրջանի ընթացքում։
Այդ դիրքորոշման պաշտոնական ընդունումից հետո Խորհուրդը կհաստատի այն, և կանոնակարգը կընդունվի՝ ուժի մեջ մտնելով ԵՄ Պաշտոնական տեղեկագրում հրապարակմանը հաջորդող օրը։
Կարինե Ասատրյան
Բրյուսել
