Հայաստանում եղել են քաղբանտարկյալներ, և ՀՀԿ-ն պատասխանատու է դրա համար․ Անդրիաս Ղուկասյան

Անդրիաս Ղուկասյանի պաշտպան Կարեն Մեժլումյանը պնդում է՝ իր պաշտպանյալը եղել է քաղբանտարկյալ։ Այս մասին այսօր հրավիրված մամուլի ասուլիսի ժամանակ ասաց Մեժլումյանը՝ շեշտելով, որ Ղուկասյանի կալանավորման դեմ բողոքի քննությունը մերժվել էր քաղաքական դրդապատճառներով, ինչի վերաբերյալ իրավական գնահատական է տրվել ՄԻԵԴ-ում։

«Մենք Եվրոպական դատարան էինք դիմել կալանավորման մասով։ Նոյեմբերի 30-ին գործը կոմունիկացվել է, այսինքն՝ գործն ընդունել են վարույթ և կառավարությանը հարցեր առաջադրել։ Առաջին հարցն այն է, որ քաղաքական դրդապատճառներով կալանավորման դեմ բողոքը մերժվել էր։ Եվրոպական դատարանը հարցրել էր՝ որքանո՞վ է դա համընկնում կոնվենցիայի 18-րդ հոդվածին։ Եթե Անդրիաս Ղուկասյանը կալանքի տակ է պահվել քաղաքական դրդապատճառներով, սա 18-րդ հոդվածի խախտում է, և դատարանը ՀՀ կառավարությանը տվել է այդ հարցը»,- ասաց պաշտպանը։

Ասուլիսին մասնակից Անդրիաս Ղուկասյանն էլ հիշեց, որ երբ Արփինե Հովհաննիսյանին ու Վիգեն Սարգսյանին հարցնում էին ՀՀ-ում քաղբանտարկյալներ կան, վերջիններս ստում էին՝ պատասխանելով ոչ։

«Երկու տարի առաջ նրանց հարցնում էին՝ Հայաստանում քաղբանտարկյալներ կա՞ն, թե՞ ոչ։ Արփինե Հովհաննիսյանը նայում էր հանրության  աչքերին և ասում՝ ոչ։ Իրականում Հայաստանում եղել են քաղբանտարկյալներ, և ՀՀԿ-ն պատասխանատու է դրա համար։ Այդ մարդիկ, երբ այսօր խոսում են արդարադատությունից, առաջինը պետք է այս հարցի պատասխանը տան»,- ասաց Անդրիաս Ղուկասյանը։

Հիշեցնենք, որ Անդրիաս Ղուկասյանին մեղադրանք է առաջադրվել Սարի թաղի գործով, այնուհետև մեղադրանքներ են առաջադրվել «Սասնա ծռերին» օժանդակելու, ապօրինի զենք կրելու մեջ։