Պետդումայում հայտարարել են, թե ՌԴ-ն Հայաստանից հետ կվերցնի բոլոր «նվերները»

Ռուսաստանը հետ կվերցնի Հայաստանից բոլոր «նվերներն» ու արտոնությունները, եթե Երևանը խաղա Արևմուտքի հետ։ Այս մասին ՏԱՍՍ-ի հետ զրույցում հայտարարել է ՌԴ Պետդումայի միջազգային հարաբերությունների հանձնաժողովի նախագահի առաջին տեղակալ Ալեքսեյ Չեպան՝ մեկնաբանելով Ռուսաստանի Անվտանգության խորհրդի ղեկավարի տեղակալ Դմիտրի Մեդվեդևի դիտարկումը, որ Մոսկվան պատճառ չունի «մարգարիտներ շաղ տալու» Հայաստանի ներկայիս ղեկավարության առջև։

Չեպան հավելել է, որ Երևանի համար անհնար կլինի միաժամանակ «երկու աթոռի վրա նստել»՝ անդամակցելով և՛ ԵՄ-ին, և՛ ԵՏՄ-ին։

«Նրանք ցանկանում են ստանալ Ռուսաստանից բոլոր արտոնությունները և միաժամանակ խաղալ Արևմուտքի հետ։ Թող խաղան։ Բայց այդ դեպքում մենք էլ, բնականաբար, կվերացնենք այն բոլոր «նվերները», որոնք տարիներ շարունակ արել ենք այդ երկրին։ Եվ Փաշինյանի համար շատ դժվար կլինի»,- հայտարարել է ռուսաստանցի խորհրդարանականը։

Չեպան անհիմն է համարում Երևանի հայտարարությունները, թե ինչ-որ մեկը դեմ է լինելու Հայաստանի՝ ՀԱՊԿ-ին անդամակցությանը։

«Ոչ ոք դեմ չի լինելու։ Թող իրենք դուրս գան։ Չեն ուզում՝ թող դուրս գան։ Ոչ ոք ոչ ոքի չի պահում»,- հայտարարել է նա։

Նախօրեին Դմիտրի Մեդվեդևը մեկնաբանել էր Հայաստանի՝ ԵՄ-ին միանալու փորձերը։ Նա նշել էր, թե այդ կուրսը երբեք չի հանգեցնի Երևանի՝ միության անդամ երկրների շարքում հայտնվելուն, բայց կարող է շատ լրջորեն, եթե ոչ՝ անդառնալիորեն, փչացնել Երևանի հարաբերությունները Մոսկվայի և ԵՏՄ մյուս երկրների հետ։

Թարգմանությունը՝ Էմմա Չոբանյանի