Եթե Հայաստանին անհրաժեշտ չէ ՀԱՊԿ-ին անդամակցությունը, կարող է հեռանալ կազմակերպությունից․ Պեսկով

Երևանն ազատ է ՀԱՊԿ-ից դուրս գալու որոշում կայացնելու հարցում, եթե Հայաստանն այլևս կազմակերպության անդամակցության կարիքը չունի։ Այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը, գրում է ՌԻԱ Նովոստին։

Ավելի վաղ ՀՀ վարչապետ Նիկոլ Փաշինյանը հայտարարել էր, որ գոհ կլինի, եթե ՀԱՊԿ-ը հեռացնի Հայաստանին կազմակերպությունից։

«Ես դժվարանում եմ հասկանալ, թե ինչ է նշանակում՝ գոհ կլիներ, եթե հեռացնեին։ Եթե Երևանը, իր ազգային շահերից ելնելով, այլևս անհրաժեշտ չի համարում անդամակցությունը տարածաշրջանային անվտանգության ապահովման համար այդքան կարևոր կազմակերպությանը, ապա ազատ է համապատասխան որոշում կայացնել և հեռանալ այդ կազմակերպությունից»,- լրագրողներին ասել է Պեսկովը։

Նա նշել է, որ «մինչ օրս լսել են հայկական կողմի ներկայացուցիչների՝ տարբեր մակարդակի հայտարարություններ, որոնցում ասվում է, որ անդամակցությունը սառեցված է, բայց Հայաստանը դեռևս դուրս գալ չի պլանավորում:

«Ամեն դեպքում՝ մինչև հիմա մենք դա ենք լսել»,- եզրափակել է Կրեմլի խոսնակը:

Հիշեցնենք, որ Նիկոլ Փաշինյանը հայտարարել էր, որ առաջիկա հինգ տարում ՀԱՊԿ վերադառնալու պլաններ չկան։ Նա ասել է, որ եթե կազմակերպությունը որոշի Հայաստանին հեռացնել, դա կթեթևացնի որոշումների կայացման գործընթացը։

«Ես շատ գոհ կլինեմ, եթե կազմակերպությունը որոշի ՀՀ-ին հեռացնել ՀԱՊԿ-ից, մեզ, համենայն դեպս, կազատի դուրս գալ-չգալու երկընտրանքից»,- նշել է նա։

Թարգմանությունը՝ Էմմա Չոբանյանի