ԱՄՆ-ը պատրանքներ չունի Ռուսաստանի կողմից պատերազմը դադարեցնելու ցանկության վերաբերյալ, իսկ Չինաստանն այլևս չպետք է լռի․ Զելենսկի

Ուկրաինայի նախագահ Վլադիմիր Զելենսկին հայտարարել է, որ ամերիկյան կողմը վերջնականապես ազատվել է ռուս-ուկրաինական պատերազմում Ռուսաստանի դիրքորոշման վերաբերյալ պատրանքներից, գրում են ուկրաինական լրատվամիջոցները։

«Ես ուրախ եմ, որ ԱՄՆ-ի մոտ վերացել են բոլոր պատրանքներն այն հարցում՝ արդյո՞ք Ռուսաստանն իսկապես ցանկանում է վերջ դնել այս պատերազմին։ Ես հավատում եմ, որ Ամերիկայի մոտ կվերանան Ռուսաստանի նկատմամբ ունեցած բոլոր հակասություններն ու ֆոբիաները։ Պետք է ռուսներին նստեցնել բանակցությունների սեղանի շուրջ։ Վերջապես պետք է սահմանել այնպիսի պատժամիջոցներ, որոնցից նրանք կոռնան։ Պետք է Ուկրաինային տալ այն ամենը, ինչը կստիպի նրանց ավարտել պատերազմը։ Եվ դա հնարավոր է։ Այն ամենի մասին, ինչն այսօր պաշտպանում է Ուկրաինան, սկզբում մեզ ասում էին՝ «անհնար է», հետո՝ «շատ դժվար է», ապա՝ «ոչ այնքան արագ»։ Իսկ հետո Ամերիկան որոշում էր կայացնում։ Եվ դա աշխատում էր։ Ամերիկայի ուժն անվիճելի էր»,- ասել է Զելենսկին Ուկրաինայի քաղաքացիներին Անկախության օրվա առթիվ ուղղված շնորհավորական ուղերձում։

Նա նշել է, որ Ուկրաինան չի խնդրում «մեզ համար կռվել», այլ պարզապես խնդրում է տալ «ամեն ինչ՝ այս պատերազմը դադարեցնելու համար, այն ավելի արագ դադարեցնելու համար, քան Պուտինը կհասցնի սկսել հաջորդը»։

Ուկրաինայի նախագահը նաև կոչ է արել Չինաստանին արձագանքել Ռուսաստանի գործողություններին և հայտարարություններին՝ վերահաստատելու իր սեփական առաջնորդական հավակնությունները համաշխարհային ասպարեզում։

«Չինաստանն այլևս չպետք է լռի։ Չինաստանը պետք է ապացուցի իր հավակնությունը՝ լինելու համաշխարհային առաջատար ոչ միայն տնտեսապես և տեխնոլոգիապես, այլև քաղաքակրթական առումով՝ հստակեցնելով, որ ոչ մի բռնապետ չպետք է սպառնա մոլորակին իրենց հին մարտագլխիկներով»,- ընդգծել է Զելենսկին։

Նա նաև կոչ է արել եվրոպական երկրներին և աշխարհին միավորվել՝ ագրեսորի վրա ճնշում գործադրելու համար՝ ընդգծելով, որ գործընկեր երկրների հետ միասին Ուկրաինան ի վիճակի է կանգնեցնել Ռուսաստանին: Զելենսկին ասել է, որ «Ուկրաինայի կողմում ավելի շատ մարդիկ կան, ավելի շատ երկրներ՝ ճշմարտության կողմում», և որ Ուկրաինան ունի «շատ ընկերներ», որոնք կօգնեն նրան խաղաղություն գտնել։

«Կգա նաև այն օրը, երբ խաղաղություն կհաստատվի Ուկրաինայում: Մենք բոլորս մարդիկ ենք, և մենք բոլորս ուզում ենք ապրել ոչ թե «պատմական» ժամանակներում, այլ պարզապես հանգիստ և անվտանգ ժամանակներում: Խաղաղ Ուկրաինայում: Այն Ուկրաինայում, որը կարողացել է: Այն Ուկրաինայում, որը դիմացել է: Այն Ուկրաինայում, որը պահպանել է իրեն և իր անկախությունը: Ահա թե ինչի համար ենք մենք պայքարում: Հավատալով միմյանց, մեր Պաշտպանության ուժերին, մեր պետությանը»,- եզրափակել է Զելենսկին:

Թարգմանությունը՝ Էմմա Չոբանյանի