24.08.2026 | 13:33
Էսօր կան ընկերություններ, որոնք պատրաստ են 400 մլն դոլար վճարել․ Փաշինյանը՝ երկաթգծի կոնցեսիայի մասին․ ՏԵՍԱՆՅՈՒԹ
Եվրահանձնաժողովը հաստատել է 6,1 միլիարդ եվրոյի աջակցությունը՝ Ուկրաինայի պաշտպանական գնումերի համար
Քաղաքականություն
24.08.2026 | 12:52
Եվրոպական հանձնաժողովի շենքը լուսավորվել է կապույտ և դեղին գույներով՝ ի նշան Ուկրաինային ԵՄ աջակցության և համերաշխության
Եվրոպական հանձնաժողովը հաստատել է 6,1 միլիարդ եվրոյի չափով աջակցությունը՝ Ուկրաինայի պաշտպանական գնումների նոր փաթեթի համար: Ֆինանսավորումը ներառում է օդային և հրթիռային պաշտպանության համակարգեր, հրթիռներ, ռազմամթերք և ռադարներ:
«Քանի որ Ռուսաստանն ուժեղացնում է հարձակումները, մենք ուժեղացնում ենք մեր օժանդակությունը՝ օգնելու Ուկրաինային պաշտպանել իր ժողովրդին և պաշտպանել իր երկինքը: Եվրոպան կանգնած է Ուկրաինայի կողքին, և մենք կապահովենք այն, ինչ անհրաժեշտ է, և երբ դա անհրաժեշտ է»,- հայտարարել է Եվրոպական հանձնաժողովի նախագահ Ուրսուլա ֆոն դեր Լայենը։
Սա Եվրամիության յուրահատուկ նվերն է Ուկրաինայի անկախության օրվա առիթով։ Այսօր՝ օգոստոսի 24-ին, Ուկրաինան նշում է անկախության 35-ամյակը։
Գնումների մեծ մասը կիրականացվի ԵՄ ընկերություններից: Հաշվի առնելով, որ Ռուսաստանն ավելի ինտենսիվ է կիրառում բալիստիկ հրթիռներ և անօդաչու սարքեր, Հանձնաժողովն ընդգծում է ԵՄ մատակարարումներն էականորեն ավելացնելու անհրաժեշտությունը՝ պաշարների օգտագործման, պատվերների վերադասավորման և արտադրության ծավալների ավելացման միջոցով:
Ֆինանսավորումն իրականացվում է 90 միլիարդ եվրո արժողությամբ Ուկրաինային տրամադրվող աջակցության վարկի (UASL) ծրագրի շրջանակում, որը հաստատվել էր գարնանը։
UASL-ը 2026-2027 թվականների համար նախատեսում է 30 միլիարդ եվրո՝ բյուջետային աջակցության և 60 միլիարդ եվրո՝ պաշտպանության համար, այդ թվում՝ 28,3 միլիարդ եվրո 2026 թվականին՝ Ուկրաինայի պաշտպանական արդյունաբերական կարողությունների ամրապնդման նպատակով:
Վարկի մարումն իրականացվելու է միայն այն բանից հետո, երբ Ուկրաինան Ռուսաստանից պատերազմական փոխհատուցումներ ստանա։
Ըստ Եվրահանձնաժողովի՝ ֆինանսավորման որոշումներն ընդունվում են Ուկրաինայի փոփոխվող կարիքներին համապատասխան և ենթակա են համաձայնեցված պայմանների ու վերահսկողության:
2022 թվականից ի վեր ԵՄ-ն ու անդամ պետություններն Ուկրաինային տրամադրել են, ընդհանուր առմամբ, 220,2 միլիարդ եվրոյի աջակցություն, այդ թվում՝ 3,8 միլիարդ եվրո՝ սառեցված ռուսական ակտիվներից:
Կարինե Ասատրյան
Բրյուսել
