08.12.2025 | 22:30
Չինաստանը մարդանման ռոբոտներ կտեղակայի Վիետնամի սահմանին պարեկության համար
ՃՈ-ն 350 միլիոն դրամի պայմանագիր է կնքել «Հայփոստի» հետ
Տնտեսություն
26.07.2017 | 14:44
ՀՀ կառավարությանն առընթեր ոստիկանությունը մայիսի 26-ին 350 միլիոն 728 հազար 300 դրամ արժողությամբ պայմանագիր է կնքել «Հայփոստ» ընկերության հետ «Փոստային կապի հետ կապված սուրհանդակային կապի և օժանդակ ծառայությունների վճարովի մատուցման» համար։ Այս մասին տեղեկացանք Կառավարության էլեկտրոնային կառավարման կայքի «Մեկ անձից կատարվող գնումներ» բաժնից։
Պայմանագրի կողմերն են «Հայփոստ» ընկերության գլխավոր գործադիր տնօրենի պաշտոնակատար Հայկ Ավագյանը և փոխոստիկանապետ Անուբախ Համբարյանը։ Պայմանագրում նշվում է, որ ծառայությունն իրականացնող ընկերությունը պարտավորվում է հաճախորդին մատուցել փոստային կապի ծառայություններ, այդ թվում՝ արագընթաց, հեռագրային և սուրհանդակային փոստային ծառայություններ։
«Պայմանագրի ընդհանուր գինը սահմանվում է 350 միլիոն 728 հազար 300 դրամ։ Նախատեսված գումարի շրջանակներում հաճախորդն իրավունք ունի առանց սահմանափակումների օգտվել պայմանագրով նախատեսված ծառայութուններից»,- ասված է պայմանագրում։
Ծառայությունների մատուցման պայմաններում նշված է, որ պատվիրատուն առաքման ենթակա նյութերը կատարողին է հանձնում Ծովակալ Իսակովի 9 հասցեից, որտեղ գտնվում է Ճանապարհային ոստիկանությունը։ Մինչև 20 գրամանոց մեծածավալ փոստային առաքման և սուրհանդակային ծառայության արժեքը, ըստ պայմանագրի՝ ներառյալ ավելացված արժեքի հարկը, 350 դրամ է։ Երկու հասցեով առաքանիների՝ երկրորդ հասցեով վերաուղարկման համար 105 դրամ է հաշվարկվում՝ ներառյալ ԱԱՀ-ն։
Նկատենք, որ ՃՈ-ն վարորդներին առաքանիով ծանուցում է տուգանքների և դրանց հետ կապված հետագա դատական գործընթացների մասին։
Սեդա Ղուկասյան
